10 September 2018

«Qudrat media» studiyası tárepinen Ájiniyaz Qosıbay ulınıń ómiri haqqında sóz etetuǵın «Ziywar» atlı tariyxıy kórkem film súwretke alınbaqta.

Filmdi súwretke alıw jumıslar usı jıldıń may ayında baslanǵan bolıp, házirgi waqıtta juwmaqlanıw aldında tur. Súwretke alıw jumısları Xiywa qalasında hám Qaraqalpaqstannıń belgili tariyxıy orınlarında bolıp ótpekte.

Rejissyorı Qudrat Atajanov, scenariya avtorı Muratbay Nızanov esaplanǵan bul tariyxıy filmde Qaraqalpaqstan Respublikasınıń belgili kórkem óner ǵayratkerleri rol atqarmaqta.
Filmde bas qaharman – Ájiniyazdıń rolin Nókis mámleketlik pedagogikalıq institutınıń muzıkalıq tálim baǵdarınıń 3-kurs studenti Aybek Jamalov atqarmaqta.

Bas qaharmannıń roli ushın kastingde 250 den aslam talabanlar qatnasqan bolıp, onda NMPI studenti Aybek Jamalov aytıs ónerindegi qábileti sebepli film dóretiwshileri tárepinen bas rolge saylap alınǵan.
Maǵlıwmat ushın, Nókis mámleketlik pedagogikalıq institutınıń studenti Aybek Jamalov 2014- hám 2016-jılları Qazaqstan Respublikasınıń Almatı qalasında ótkerilgen «Jas aqındar sayısı» xalıqaralıq tańlawında 1- hám 3-orın jeńimpazı bolǵan. Sonday-aq, 2017-jılı Almatıda ótkerilgen «Aqındar» xalıqaralıq tańlawına qatnasıp, 3-orındı jeńip alǵan. 2017-jılı dekabr ayında Nókis qalasında jas atqarıwshılar arasında ótkerilgen «Qutlı bolsın jańa jıl» baqsılar aytısında 2-orındı iyelegen.

Islam Matekov,
NMPI baspasóz xatkeri.

Tags: