10 September 2018

6-sentyabr kúni Ájiniyaz atındaǵı Nókis mámleketlik pedagogikalıq institutı dene mádeniyatı fakultetinde «6-sentyabr – Kurash milliy sport kúni» múnásibeti menen ushırasıw keshesi bolıp ótti.
Ilajǵa Ózbekstan Respublikasına miyneti sińgen dene tárbiya hám mádeniyat xızmetkeri, veteran sportshı, sport ustası J.Mámbetov, institut dene mádeniyatı fakulteti dekanı A.Utepbergenov, institut sport klubınıń baslıǵı A.Erejepov, dene mádeniyatı fakulteti 3-kurs studenti, sport ustası SH.Jollıbaeva, 3-kurs studenti, Aziya chempionı hám jaqında bolıp ótken Aziya oyınları qatnasıwshısı N.Esenbaeva, 3-kurs studenti, xalıqaralıq kólemdegi sport ustası A.Maqsetbaev hám fakultettiń student-jasları qatnastı.

Ushırasıw keshesin instituttıń jaslar menen islesiw máseleleri boyınsha prorektorı Q.Kadirov alıp bardı. Ushırasıwda institut dene mádeniyatı fakulteti dekanı A.Utepbergenov sózge shıǵıp, ótken jıldan berli «6-sentyabr – Kurash milliy sport kúni» sıpatında keń túrde belgilenip atırǵanı, ata-babalarımızdan miyras bolıp kiyatırǵan milliy sport túrin rawajlandırıw, xalıqaralıq kólemde keń en jaydırıw jolında ámelge asırılıp atırǵan jumıslarǵa keń toqtaldı.
Atap ótilgenindey, kurash boyınsha 1999-jılı Tashkent qalasında birinshi márte jáhán chempionatı ótkerilgen bolsa, usı kúnge shekemgi waqıt ishinde milliy sportımız Aziya oyınları quramına kirdi. Ótken jılı sentyabr ayında Túrkmenstanda ótkerilgen jabıq imaratlardaǵı birinshi Aziya oyınlarına kurash sportı da kirgizilip, respublikamız palwanları 10 altın hám 1 bronza medalın qolǵa kirgizgen edi.
Usı jılı Indoneziyanıń Djakarta hám Palembang qalalarında ótkerilgen Aziya oyınları sport túrleri qatarına kurashtıń da qosılǵanlıǵı bul sport túriniń xalıqaralıq kólemde rawajlanıp, keń en jayıp atırǵınan dárek beredi. Bul jarısta da jerleslerimizdiń 6 altın, 2 gúmis hám 4 bronza medalların qolǵa kirgiziwi sportshılarımızdıń xalıqaralıq dárejesin kórsetip berdi.

Ushırasıwda veteran ustazlar, fakultettiń úmitli sportshıları da shıǵıp sóylep, elimizde sporttı hár tárepleme en jaydırıw, salamat turmıs tárizin engiziwge berilip atırǵan itibardan nátiyjeli paydalanıw jaslar aldındaǵı baslı wazıypalardıń biri ekenligin atap ótti.

Bayram múnásibeti menen veteran ustazlar hám sportshılarǵa estelik sawǵaları tapsırıldı.
 
Islam Matekov,
NMPI baspasóz xatkeri.

Tags: