22 August 2018

Islam dini – tınıshlıq hám tatıwlıqqa, bir-birewge miyrim-shápáátli bolıwǵa shaqıratuǵın din esaplanadı.

Muqaddes dinimizdiń úlken bayramlarınıń biri Qurban hayt bayramı elimizde kөterińki ruwxta ótpekte. Xalqımız bir-biriniń halınan xabar alıp, bayramda jaqsı tileklerin aytıp, búgingidey jaqtı kúnlerimizge shúkirshiligin bildirip, kóterińki keypiyatta bayramdı belgilemekte.

photo_2018-08-23_17-19-53.jpg

Hayt bayramınıń ózgeshelikleriniń biri sawap islerdiń isleniwi, insanlardıń bir-birine járdem qolın sozıp, mútájlerdi qollap-quwatlawı bolıp tabıladı. Bul Ózbekstan Respublikası Prezidentiniń 2018-jıl 16-avgusttaǵı «Qurban haytın belgilew haqqında»ǵı Pármanında da өz kөrinisin tapqan. Ájiniyaz atındaǵı Nókis mámleketlik pedagogikalıq institutı jámááti de muqaddes bayramımız – Qurban hayt bayramında usınday sawaplı islerdi ámelge asırmaqta. Institut jámááti wákilleri bayram kúni Xojeli rayonındaǵı 1-sanlı Mehriybanlıq úyi, Hayal-qızlar múriwbet úyi hám Aqılı zayıl balalar mektep-internatında bolıp, usı jerlerde tárbiyalanıp atırǵan hám sociallıq qollap-quwatlawǵa mútáj bolǵan insanlardıń halınan xabar aldı, olar ushın institutımız jámááti tárepinen tayarlanǵan bayram sawǵaların tapsırdı.

Óz gezeginde, bul dárgaylardıń basshıları, oqıwshı hám tárbiyalanıwshıları, járdemge mútáj bolǵan insanlar bayram kúnleri kөrsetilip atırǵan usınday ǵamqorlıq jáne itibar ushın minnetdarshılıǵın bildirdi.

Islam Matekov,  NMPI baspasөz xatkeri.