5 September 2018

Búgin – 5-sentyabr kúni elimizdegi barlıq bilimlendiriw mákemelerinde 2018-2019-oqıw jılı baslanıp, orınlarda «Bilimler kúni» bayram ilajları ótkerildi.

Ájiniyaz atındaǵı Nókis mámleketlik pedagogikalıq institutında da jańa oqıw jılınıń dáslepki kúni – «Bilimler kúni» bayramı bolıp ótti.

Bayram ilajı Ózbekstan hám Qaraqalpaqstan Respublikalarınıń mámleketlik gimnleri menen baslandı.
Kesheni instituttıń jaslar menen islesiw máseleleri boyınsha prorektorı Q.Qadirov alıp bardı.

Ilajdı institut rektorı B.Otemuratov kiris sóz benen ashıp berdi. Institut rektorı óz sózinde búgingi kúnde húkimetimiz hám Prezidentimizdiń tikkeley baslaması menen bilimlendiriw, ásirese, joqarı maǵlıwmatlı, hár tarawda jetekshi kadrlardı jetilistiriwde áhmiyetli esaplanǵan joqarı bilimlendiriwge berilip atırǵan itibar jáne ǵamqorlıqlar, qolǵa kirgizilip atırǵan tabıslar hám alda turǵan wazıypalarǵa toqtaldı. Jıynalǵanlardı Ǵárezsizligimizdiń 27 jıllıǵı hám «Bilimler kúni» bayramı menen qutlıqladı.

Bunnan soń akademik J.Bazarbaev, Ózbekstan Qaharmanı Ǵ.Xojaniyazov, Qaraqalpaqstan Jazıwshılar awqamı baslıǵı K.Kárimov, professor, Qaraqalpaqstan xalıq jazıwshısı K.Allambergenov hám institut professor-oqıtıwshıları sózge shıǵıp, jańa oqıw jılınıń baslanıwı menen bárshe jıynalǵanlardı qutlıqladı, studentlerdiń aldaǵı oqıwlarına tabıslar tiledi.

Bayram saltanatı studentlerdiń ant beriw ilajı menen dawam etti. Studentler atınan bıyılǵı jılı «Mard wǵlon» mámleketlik sıylıǵınıń laureatı bolıp, instituttıń milliy ideya, ruwxıylıq tiykarları hám huqıqıy bilimlendiriw baǵdarına test sınaqlarısız qabıl etilgen SH.Genjegulov oqıwda hám jámiyetlik jumıslarda belsendilik kórsetiwge, insituttıń ishki tártip-qaǵıydaların húrmet etip, olarǵa ámel etiwge hám qánigeli bilim alıwǵa bar kúsh-jigerin jumsawǵa ant berdi.

Sońınan institut rektorı B.Otemuratov studentlerge «Bilimler gilti»n saltanatlı túrde tapsırdı.

Institutqa eń joqarı ball toplap, sonday-aq, pán olimpiadalarında hám sport jarıslarında jeńimpazlıqtı qolǵa kirgizip, test sınaqlarısız student bolıw baxtına erisken student-jaslarǵa studentlik gúwalıqları tapsırıldı.

Ilaj sońında studentlik baxtına erisken jaslar shıǵıp sóylep, bildirilip atırǵan úlken isenim ushın minnetdarshılıq bildirdi.
«Bilimler kúni» instituttıń 281 bakalavr hám 38 magistratura baǵdarlarındaǵı akademiyalıq toparlarda «Ǵárezsizlik sabaqları» menen dawam etti.

Islam Matekov,
NMPI baspasóz xatkeri.

Tags: