12 September 2018

Ájiniyaz atındaǵı Nókis mámleketlik pedagogikalıq institutınıń málimleme-resurs orayı respublikamızdaǵı joqarı oqıw orınları kitapxanalarınıń ishinde eń bay kitap fondına iye bolǵan dárgaylardıń biri bolıp tabıladı. 


Málimleme-resurs orayınıń ulıwmalıq kitap fondı 133 090 danadan ibarat. Sonıń ishinde, sabaqlıq hám oqıwlıq qollanbalar 42 872, kórkem ádebiyatlar 39 970, ilimiy ádebiyatlar 21 965, jámiyetlik ádebiyatlar 25 714 hám sırt el ádebiyatları 2569 dı quraydı. Bul jerde kitaplar fondı jańadan jarıq kórgen ádebiyatlar menen turaqlı túrde tolıqtırılıp turıladı. 2017-jılı kitaplar fondı 260 atamadaǵı 1636 dana kitaplar menen tolısqan bolsa, 2018-jıldıń usı kúnge shekemgi dáwirinde bul jerge 193 atamadaǵı 1328 dana jańa kitaplar alıp kelindi. Alıp kelingen jańa ádebiyatlar óz waqtında kitap oqıwshılarına tanıstırılıp barıladı.

Házirgi waqıtta institut málimleme-resurs orayına 7282 kitap oqıwshısı aǵza bolıp, olardıń basım kópshiligi institut student-jasları bolıp tabıladı. Resurs orayınıń kitap oqıwshıları qatarında institut átirapındaǵı mákan puqaralar jıyınlarınıń 1700 ge shamalas adamlardıń bar ekenligi bul oray jumıslarınıń qanshelli dárejede áhmiyetke iye ekenligin kórsetip tur.
Institut málimleme-resurs orayı kúnine 500 ge shamalas kitap oqıwshılarına xızmet kórsetip kelmekte.

Resurs orayında 70 atamadaǵı gazeta hám jurnallar turaqlı túrde jańalanıp turıladı. Bul jerde jámi 112 zamanagóy kompyuter bolıp, olardıń barlıǵı Internet tarmaǵına jalǵanǵan. Sonday-aq, orayda elektron kitapxana da shólkemlestirilgen bolıp, resurs orayındaǵı az sandaǵı oqıw ádebiyatlarınan 5235 elektron ádebiyatlar skanerlengen variantta kompyuterlerge ornalastırılǵan.

Usı kúnge shekem 14 498 atamadaǵı ádebiyatlar ARMAT baǵdarlamasına kirgizilip, elektron katalog boyınsha jumıslar dawam etpekte. 
Instituttıń málimleme-resurs orayı bes bólimnen ibarat:
1. Ilimiy-metodikalıq hám málimleme maǵlıwmat bólimi.
2. Kitapxana resursların tolıqtırıw, kataloglastırıw hám sistemalastırıw bólimi.
3. Málimleme-kitapxana resursları menen xızmet kórsetiw bólimi.
4. Elektron málimleme resursları bólimi.
5. Sırt el málimleme-kitapxana resursları menen islesiw bólimi.

Bul jerde 5 kitap beriw bólimi, 6 kompyuter xanası (elektron oqıw zalı) bar. Oqıw zallarındaǵı kompyuterler Internet tarmaǵına jalǵanǵan.
Student-jaslarǵa qolaylıq jaratıw maqsetinde instituttıń fizika-miynet hám matematika-informatika fakultetleri imaratında, ximiya-biologiya hám tariyx-geografiya fakultetleri imaratında, sonday-aq, studentler turaq jayında resurs orayınıń filialları jumıs alıp barmaqta.

Instituttıń málimleme-resurs orayında 2017-jıl 2-sentyabrden baslap jas áwladtıń intellektual hám mádeniy dárejesin arttırıw, málimleme hám kitap oqıw mádeniyatın jetilistiriw, bilim alıwı hám erkin pikirlewin qollap-quwatlaw, kitapqumarlıq mádeniyatın qáliplestiriw maqsetinde «Kitapqumarlar klubı» óz jumısın dawam ettirmekte. Klubqa instituttıń 200 den aslam qábiletli, intalı studentleri aǵza bolıp, olar turaqlı túrde ádebiyatımızdıń belgili tulǵaları, dóretiwshi insanlar menen ushırasıwlar, sonday-aq, hár qıylı intellektual oyınlardı shólkemlestirip kelmekte.

Sonday-aq, institut málimleme-resurs orayında Scopus hám Science Direct xalıqaralıq maǵlıwmatlar bazasınan paydalanıwdı úyretiw boyınsha másláhát orayı xızmet kórsetpekte. Dúnya júzilik kólemde belgili bolǵan ilim izertlewshilerdiń ilimiy miynetleri toplanatuǵın bul xalıqaralıq sistemalardıń ámeliy áhmiyeti oǵada úlken. Ayta ketetuǵın jeri, bul másláhát orayı tárepinen alıp barılıp atırǵan jumıslar nátiyjesinde Scopus hám Science Direct xalıqaralıq maǵlıwmatlar bazasınan paydalanıw boyınsha Nókis mámleketlik pedagogikalıq institutı Ózbekstan kóleminde 2-orındı iyeledi. Házirgi waqıtta bul jerde professor-oqıtıwshılar hám studentlerge xalıqaralıq maǵlıwmatlar bazasınan paydalanıw boyınsha zárúr kónlikpeler berilmekte.

Málimleme-resurs orayı direktorı Yaqıpbek Genjemuratov biz benen sáwbette orayda aldaǵı waqıtları ámelge asırılatuǵın jumıslar haqqında da aytıp ótti.
- Málimleme-resurs orayı kitapxanadan túpkilikli parqlanadı. Bul jerge keliwshiler tek ǵana kitaplardı alıw yamasa oqıw ushın emes, sonıń menen birge, eń sońǵı jańalıqlar, informaciyalar menen tanısıw ushın da keledi. Sol sebepli, biz orayımızdıń elektron oqıw zalında háptede eki kún Internet tarmaǵındaǵı jańalıqlar, aktual máseleler boyınsha, sonday-aq, oqıw zallarında gazeta-jurnallardaǵı materiallarǵa sholıw jasaw, keń jámiyetshilikke tanıstırıw jumısların alıp barıwdı jobalastırıp otırmız, - deydi málimleme-resurs orayı direktorı.

Islam Matekov,
NMPI baspasóz xatkeri.

Tags: