11 September 2018

11-sentyabr kúni Ájiniyaz atındaǵı Nókis mámleketlik pedagogikalıq institutında Yaponiyanıń pedagog kadrlardı tayarlaytuǵın birneshe joqarı oqıw orınları professorları jáne ilimiy xızmetkerleri menen ushırasıw bolıp ótti.

Yaponiya ilimiy rawajlandırıw jámiyetiniń «Sociallıq hám tábiyǵıy ilimlerdi turaqlı rawajlandırıw baǵdarında global oqıwlıq baǵdarlamalardı rawajlandırıw» joybarı sheńberinde shólkemlestirilgen ilimiy izertlew delegaciyası menen ótkerilgen ushırasıwdıń dáslepki bóliminde Aral boyı regionındaǵı mekteplerde oqıwshılardıń ekologiyalıq bilimin jetilistiriw, bunıń ushın bilimlendiriw tarawında ámelge asırılıp atırǵan jumıslar, sonday-aq, ekologiya hám qorshaǵan ortalıqtı qorǵaw baǵdarında Nókis mámleketlik pedagogikalıq institutında joqarı maǵlıwmatlı kadrlardı tayarlawdıń ózgeshelikleri boyınsha institut rektorı hám prorektorlar menen óz ara pikir almasıldı.

Cukuva universitetiniń bilimlendiriw institutı professorı Yosiyasu Ida, Tokio Gakugey universiteti professorı Masataka Arai, Dokkyo universiteti professorı Xiroaki Akimoto, Dzyoecu pedagogikalıq institutı professorı Takasi Simura, Mie universiteti professorı Sigefumi Nagata hám basqa da yaponiyalı professorlar institutta jámiyettanıw hám tábiyattanıw baǵdarında ámelge asırılıp atırǵan ilimiy izertlew jumıslarınıń barısı jáne mazmunı menen tanısıw hám aldaǵı waqıtları birgelikte ilimiy-pedagogikalıq baylanıslar ornatıw boyınsha óz usınısların bildirdi.

- Yaponiya mekteplerinde ótiletuǵın geografiya sabaqlıqlarında Aral teńizi haqqında maǵlıwmatlar bar. Biraq, bular biziń oyımızsha oǵada az. Biz usı sabaqlıqlarǵa teńizdiń qurıǵan ultanındaǵı házirgi ekologiyalıq jaǵday, bul jerde mámleket prezidenti hám húkimet basshılıǵında ekologiyalıq turaqlılıqtı jaqsılaw maqsetinde alıp barılıp atırǵan jumıslar, olardıń effektivliligi haqqında jergilikli ilimpazlardıń ilimiy izertlewleri nátiyjesinde anıqlanǵan maǵlıwmatlardı da kirgiziwdi jobalastırıp otırmız, - dep aytıp ótti Cukuva universitetiniń bilimlendiriw institutı professorı Yosiyasu Ida.

Ushırasıw instituttıń ximiya-biologiya hám tariyx-geografiya fakultetlerinde professor-oqıtıwshılar hám student-jaslar menen tema dógeregindegi óz ara pikir almasıw jáne soraw-juwaplar menen dawam etti.

Ushırasıw juwmaǵında delegaciya wákilleri aldaǵı waqıtlarda ekologiya hám basqa da birneshe baǵdarlar boyınsha birgelikte ilimiy-pedagogikalıq jumıslardı alıp barıwǵa kelisip aldı.

Islam Matekov,
NMPI baspasóz xatkeri.

Tags: