Mámleketlik komissiyanıń tiyisli qararına muwapıq bıyılǵı oqıw jılında tek ǵana mámleketlik joqarı oqıw orınlarınıń magistraturasına C1, B2 milliy yamasa oǵan sáykes dárejedegi xalıqaralıq sertifikatqa iye bolıp, hújjet tapsırǵan, biraq kvota sheńberinde student bola almaǵanlarǵa belgilengen bazalıq tólemli kontrakttiń 1,5 esesinen kóp bolmaǵan muǵdardaǵı tólem tiykarında magistraturada oqıw imkaniyatı jaratıldı.

Joqarı hám orta arnawlı bilimlendiriw ministrliginiń málim etiwinshe, oqıwdı qálewshiler joqarı oqıw orınlarınıń qabıllaw komissiyalarına múrájat etiwi múmkin.

Sonday-aq, 2022-2023-oqıw jılı ushın mámleketlik joqarı oqıw orınlarınıń magistraturasına dekabr-yanvar aylarındaǵı tańlawda aldınǵısınan ózgeshe tárizde shet tilin biliw dárejesine qaramastan (C1 yamasa B2 sertifikatınan tısqarı basqa dárejedegi) sertifikatqa iye talabanlar da qatnasıwına ruxsat berildi.

Áhmiyetli tárepi, oqıwǵa qabıl etilgen studentler oqıwı dawamında talap etilgenindey milliy yamasa oǵan sáykes dárejedegi xalıqaralıq sertifikattı alıwı kerek boladı. Kerisinshe jaǵdayda juwmaqlawshı mámleketlik attestaciyasına ruxsat berilmeydi.

Tańlawda qatnasıwdı qálewshilerge 2022-jıl 20-dekabrden 2023-jıl 10-yanvarǵa shekem (sol kúni de) magistr.edu.uz elektron sisteması arqalı onlayn dizimnen ótiw imkaniyatı jaratıladı.

Tańlaw nátiyjeleri bakalavriat diplomınıń ortasha balları tiykarında anıqlanadı.

Maǵlıwmat ornında atap ótiw orınlı, Prezidenttiń tiyisli qararına muwapıq abiturient filologiya baǵdarları boyınsha keminde C1, filologiyalıq emes baǵdarlar boyınsha bolsa B2 dárejedegi milliy yamasa oǵan sáykes dárejedegi xalıqaralıq sertifikatqa iye bolıw talabı belgilengen.