Búgingi kúnde Ájiniyaz atındaǵı Nókis mámleketlik pedagogikalıq institutında 18 mıńǵa shamalas student-jaslar bilim almaqta. Bilimlendiriw 5 tilde alıp barılatuǵın bul ullı dárgayda qaraqalpaq, ózbek, qazaq, túrkmen, rus, koreys, qırǵız, ázerbayjan, bashqurt, uyǵır hám tatar sıyaqlı ulıwma 11 milletke tiyisli studentler bir shańaraqtıń perzentlerindey, awızbirshilikte oqıp atır. Olar tek ǵana institutta emes, sonıń menen birge, respublikamız kóleminde ótkerilip kiyatırǵan ulıwma xalıqlıq ilajlarda da tatıwlıq penen birgelikte qatnasıp, úlken nátiyjelerdi qolǵa kirgizip kelmekte.

Búgin, 28-yanvar kúni institutta milletler aralıq tatıwlıq, doslıq hám awızbirshiliktiń áhmiyetin jaslar arasında keńnen úgit-násiyatlaw maqsetinde «Biz – bir shańaraq perzentlerimiz» atamasında ushırasıw bolıp ótti.

Instituttıń jaslar máseleleri hám ruwxıy-aǵartıwshılıq isleri boyınsha birinshi prorektorı Q.Qodirov basqarıp barǵan ilajǵa respublikamızdaǵı Qazaq milliy mádeniy orayınıń baslıǵı A.Úmbetaev, Túrkmen milliy mádeniy orayı wákili A.Oblakuliev, nuranıy aqsaqallar, professor-oqıtıwshılar hám studentler qatnastı.

Ushırasıwda atap ótilgenindey, búgingi kúnde elimizde bir júz otızdan aslam millet hám xalıqlardıń wákilleri bir shańaraqtıń perzentlerindey tatıwlıqta, awızbirshilikte jasap, túrli tarawlarda nátiyjeli miynet etpekte. Barlıq millet hám xalıqlardıń tili, mádeniyatı, úrp-ádet hám dástúrlerin saqlaw jáne rawajlandırıw ushın barlıq sharayatlar jaratılǵan. Mámleketimiz tárepinen hár qıylı milletler arasında óz ara miyrim-shápáátti bunnan bılay da bekkemlewge ayrıqsha itibar qaratılmaqta.

Sózge shıqqanlar búgingidey globallasıw sharayatında kóplegen mámleketlerde júz berip atırǵan milliy, diniy hám etnikalıq kelispewshilikler jaǵdayında biziń elimizde hár qıylı millet wákilleriniń tınısh-tatıw, abadan turmısta ómir súriwi elimizde alıp barılıp atırǵan usı baǵdardaǵı durıs siyasattıń nátiyjesi bolıp esaplanatuǵınlıǵına ayrıqsha toqtaldı.

Ushırasıw professor-oqıtıwshılar hám student-jaslar menen pikir almasıw tárizinde dawam etti.

NMPI baspasóz xızmeti.