Joqarı bilimlendiriw, ilim hám innovaciyalar ministrliginiń «Mektep – ruwxıy hám aǵartıwshılıq orayı» koncepciyası sheńberinde Ájiniyaz atındaǵı Nókis mámleketlik pedagogikalıq institutı Málimleme-resurs orayı Sırt el málimleme-kitapxana resursları menen islew bólimi hám 47-sanlı ulıwma bilim beriw mektebi menen birgelikte «Kásibim – maqtanıshım» atamasındaǵı sáwbetlesiw keshesi bolıp ótti.

Keshege instituttıń psixologiya kafedrasınıń aǵa oqıtıwshısı M.Jolımbetova, MRO sırt el málimleme-kitapxana resursları menen islew bólimi xızmetkerleri, mektep muǵallimleri hám oqıwshıları qatnastı.

Kesheni MRO sırt el málimleme-kitapxana resursları menen islew bólimi baslıǵı R.Amanbaeva alıp barıp, ulıwma bilim beriw mektepleri oqıwshı-jaslarınıń dúnyaqarasın keńeytiw, kitap oqıw mádeniyatın arttırıw hám kásipke baǵdarlaw maqsetinde institut málimleme-resurs orayı fondındaǵı ádebiyatlardan nátiyjeli paydalanıw hám metodikalıq járdem kórsetiwdi shólkemlestiriw boyınsha alıp barıp atırǵan jumıslar haqqında aytıp ótti.

Sońınan psixologiya kafedrasınıń aǵa oqıtıwshısı M.Jolımbetova mektep oqıwshılarına kásip tańlawda aljaspaw kerekligi, tańlaǵan kásipleri olardıń keleshegin belgileytuǵını hám keleshegimiz sol jaslarlıń qolında ekenligin túsindirip ótti. Jáne de oqıwshılarǵa ózligin ańlawda, kásipke baǵdarlawda psixologiyalıq keńeslerin berdi.

Bunnan keyin bólim bibliografı Z.Auezova shıǵıp sóylep, ilim-bilim alıwda jalıqpay, keleshekte barlıq oqıwshılar óz kásipleriniń mamanları bolıp jetilisiwine tilek bildirdi.

Keshe oqıwshılar menen ótkerilgen soraw-juwaplar arqalı dawam etti.