Ájiniyaz atındaǵı Nókis mámleketlik pedagogikalıq institutında student-jaslardıń teatr ónerine bolǵan qızıǵıwshılıǵın arttırıw hám ruwxıy jetiklikke baǵdarlaw arqalı ámelge asırılıp atırǵan mádeniy-aǵartıwshılıq jumıslardıń nátiyjeliligin arttırıw jáne talantlı jaslarǵa óz imkaniyatların júzege shıǵarıw ushın sharayat jaratıw hám xoshametlew maqsetinde «Studentler teatr studiyaları festivalı» shólkemlestirildi.

Oǵan instituttıń barlıq fakultetlerinen, sonıń menen birge, miyman «Aydın» komandası qatnastı.

Festivalda talantlı studentler tárepinen «Ómirbek hám Tazsha», «Ínjıqtıń muhabbatı», «Jaydari kelin» sıyaqlı milliy dramaturgiyamızdıń eń joqarı dóretpeleri menen birgelikte, institut studentleriniń qálemine tiyisli «Áskerbay hám Shaxsánem», sonday-aq, búgingi turmısımızdıń oylı-biyik jolları, ómir qıyınshılıqları, jaslar turmısındaǵı áhmiyetli máseleler saxnalastırıldı.

Solay etip, tańlaw juwmaǵına bola:

«Eń jaqsı spektakl» nominaciyası boyınsha – Baslawısh tálim fakulteti;
«Búgingi kúnniń eń aktual temasındaǵı spektakl» nominaciyası boyınsha – Dene mádeniyatı fakulteti;
«Milliy qádiriyatlarımızdı ózinde sáwlelendirgen spektakl» nominaciyası boyınsha – Fizika-matematika fakulteti;
«Eń jaqsı erkek roli» nominaciyası boyınsha – Hasılbek Júginisov (Túrkiy tiller fakulteti);
«Eń jaqsı hayal roli» nominaciyası boyınsha – Azada Uzaqbergenova (Túrkiy tiller fakulteti) jeńimpaz dep tabıldı.

NMPI baspasóz xızmeti.