Búgingidey globallasıw sharayatında jaslar tárbiyası óz aldımızǵa belgilep alǵan Jańa Ózbekstan hám Jańa Qaraqalpaqstandı qurıw, Úshinshi Renessanstıń tiykarın jaratıwday ullı maqsetlerimizge erisiw jolındaǵı áhmiyetli máselelerdiń biri bolıp esaplanadı.

Ájiniyaz atındaǵı Nókis mámleketlik pedagogikalıq institutında ótkerilgen ushırasıwda jaslar menen islesiw, olardıń jámiyetlik-siyasiy, huqıqıy bilimlerin arttırıw máselesi keń túrde dodalandı.

Ushırasıwda sózge shıqqan institut rektorı wazıypasın waqıtsha atqarıwshısı Quvondiq Qodirov búgingidey Internet hám sociallıq tarmaqlar keń túrde rawajlanıp atırǵan dáwirde jaslar tárbiyasında jol qoyılıp atırǵan kemshilikler, ásirese, olardıń sanasındaǵı boslıqtı toltırıw baǵdarında orın alıp atırǵan mashqalalarǵa ayrıqsha toqtaldı.

Atap ótilgenindey, házirgi waqıtta jaslardıń basım kópshiligi sociallıq tarmaqlardan paydalanıp, olardaǵı hár qıylı videoroliklerdi tamashalaydı. Bul bolsa olardıń sanasına, tárbiyasına óz tásirin tiygizbey qalmaydı.

Solay eken, institutta bar imkaniyatlardan paydalanǵan halda jaslardı bir jerde jámleytuǵın, olardıń turmısı, qızıǵıwshılıqları, baslamaları, jetiskenliklerin jaslarǵa say, zamanagóy usıllar menen sáwlelendirip beretuǵın jańasha platforma jaratıwǵa zárúrlik sezilmekte.

Usınday talap hám zárúrliklerden kelip shıǵa otırıp, sociallıq tarmaqlarda jumıs alıp baratuǵın, jaslar turmısın olardıń kózqarasında sáwlelendiretuǵın kanal shólkemlestiriw máselesi kórip shıǵıldı.

Tariyx fakulteti tyutorı Gúlzar Eshimbetova bul baǵdarda institut kóleminde ámelge asırılatuǵın jumıslar haqqında óz usınısların fakultet dekanlarınıń jaslar menen islesiw boyınsha orınbasarları, kásiples tyutorlar hám qábiletli, belsendi studentlerge tanıstırdı.

– Anıq maqsetlerge baǵdarlanǵan qısqasha videorolikler arqalı jaslardıń ideologiyalıq immunitetin bekkemlew, siyasiy hám huqıqıy sawatlılıq dárejesin arttırıw, olar arasında kitapqumarlıq, intellektual hám sport jarısları, sonıń menen birge, milletler aralıq tatıwlıq, awızbirshilik, keńpeyillik sıyaqlı ulıwma insanıy qádiriyatlardı kreativ usıllar menen úgit-násiyatlawdı maqset etkenbiz. Álbette, bunday jumıslardıń nátiyjesi de jaqsı bolatuǵınına isenimimiz mol, – deydi institut rektorı w.w.a. Quvondiq Qodirov.

Ushırasıwda kóterilgen baslamalar jaslar tárbiyasına juwapker qánigeler hám student-jaslar tárepinen qollap-quwatlanıp, jumıslardı ele de jetilistiriw boyınsha pikir-usınıslar bildirildi.

Bildirilgen usınıslar hám pikirler birgelikte dodalanıp, juwapkerlerge tiyisli tapsırmalar berildi.

NMPI baspasóz xızmeti.