Ájiniyaz atındaǵı Nókis mámleketlik pedagogikalıq institutında paytaxtımızdıń «Qumbız awıl», «Jas áwlad» hám «Kók ózek» mákan puqaralar jıyınları turǵınları arasında «Jańa turmıs ushın, jańa Ózbekstan ushın!» súreni tiykarında «Máhállede duw-duw gáp» atamasındaǵı úgit-násiyat ilajı bolıp ótti.

Ózbekstan Respublikası Prezidenti Sh.Mirziyoyev basshılıǵında 2023-jıl 22-dekabr kúni ótkerilgen Respublikalıq Ruwxıylıq hám aǵartıwshılıq Keńesi jıynalısında berilgen tapsırmalardıń orınlanıwın támiyinlew, kóterilgen áhmiyetli máselelerdiń mazmunın xalqımızǵa túsindiriw maqsetinde shólkemlestirilgen ilajda úgit-násiyatshı ilimpazlar, jazıwshı hám shayırlar, kórkem óner hám mádeniyat tarawı wákilleri sózge shıǵıp, Jańa Ózbekstandı qurıw jolında ámelge asırılıp atırǵan keń kólemli reformalar jáne erisilip atırǵan nátiyjeler haqqında anıq turmıslıq mısallar menen sóz etildi.

Ilaj sheńberinde sońǵı jıllarda hár bir tarawda qolǵa kirgizilgen tabıslar haqqındaǵı videorolik qatnasıwshılar názerine usınıldı.

Úgit-násiyat ilajı institut studentleriniń koncert baǵdarlaması menen dawam etti.