Ózbekstan Respublikası Joqarı bilimlendiriw, ilim hám innovaciyalar ministri Qońıratbay Sharipov Qaraqalpaqstan Respublikasına xızmet saparı sheńberinde Ájiniyaz atındaǵı Nókis mámleketlik pedagogikalıq institutınıń oqıw-dala ámeliyatı ornında shólkemlestirilgen «Studentler jazǵı lageri»n barıp kórdi.

Joqarı oqıw orınları student-jaslarınıń jazǵı demalıs waqıtların mazmunlı ótkeriw, olardı sport, intellektual oyınlar hám kewilashar ilajlarǵa qamtıp alıw maqsetinde shólkemlestirilgen lagerdiń birinshi gezegine 130 ǵa shamalas studentler qamtıp alınǵan.

Bul jerde belgilengen reje tiykarında studentlerdiń dem alıwı menen birge, olardıń intellektual potencialın arttırıw, kásiplik kónlikpelerin rawajlandırıw, sport hám mádeniy-aǵartıwshılıq ilajları arqalı jaslardıń jámiyetlik belsendiligin arttırıwǵa ayrıqsha itibar qaratılmaqta.

Bunıń ushın lagerde zárúr bolǵan barlıq sharayatlar jaratıldı. Awqatlanıw, demalıw hám juwınıw orınları, sport maydanshaları, koncert hám tamashalar saxnası, kitapqumar jaslar ushın arnawlı platformalar jaslar xızmetinde.

Lagerde hár bir joqarı oqıw ornı jámááti tárepinen studentler ushın áhmiyetli ushırasıwlar, sheberlik sabaqları, sport jarısları, teatr hám kino kesheleri, hár qıylı dógerekler shólkemlestirilmekte.

Ministr bul jerde dem alıp atırǵan jaslar menen sáwbetlesti. Olardıń aldaǵı oqıwlarında tabıslar tiledi.

Ótken jıldan berli shólkemlestirilip atırǵan studentler jazǵı lageri joybarın Qaraqalpaqstan Respublikası tájiriybesi sıpatında basqa aymaqlarda da jolǵa qoyıw máselelerin tiyisli juwapkerler menen dodaladı.

NMPI baspasóz xızmeti.