Bilimlendiriwdiń sapasın arttırıw, aldınǵı sırt el tájiriybelerin úyreniw hám professor-oqıtıwshılardıń kásiplik potencialın bekkemlew maqsetinde Ózbekstan Respublikası Mektepke shekemgi hám mektep bilimlendiriwi ministrligi sistemasındaǵı 13 pedagogikalıq joqarı oqıw ornınıń matematika hám málimleme texnologiyaları baǵdarındaǵı professor-oqıtıwshıları Ullı Britaniyanıń Kembridj universitetinde tájiriybe arttırıw baǵdarlamasında qatnaspaqta.

Quwanıshlısı, olar arasında Ájiniyaz atındaǵı Nókis mámleketlik pedagogikalıq institutı Anıq pánler fakulteti matematika kafedrasınıń úlken oqıtıwshısı Azamat Xodjaniyazov ta bar.

Qatnasıwshılar «Cambridge University Press & Assessment» shólkeminiń birge islesiwindegi «Raising Awareness of Alternatives» atamasındaǵı 8 kúnlik kursta qatnasıp, aldınǵı pedagogikalıq qatnas hám pedagog kadrlar tayarlawdıń xalıqaralıq tájiriybesin úyrenbekte.

Oqıw shınıǵıwları universitettiń Paul Warwick, Clare Brooks, Lauren Harris, Daniel Morrish, Chris Brown, Nivedita Bose sıyaqlı professorları basshılıǵında alıp barılmaqta.

Tájiriybe arttırıw baǵdarlaması 24-oktyabrge shekem dawam etedi.

Bul baǵdarlama oqıw procesine aldınǵı sırt el tájiriybelerin engiziw hám studentlerdiń bilim alıwın sapalıq jaqtan jańa basqıshqa kóteriwge xızmet etedi.

NMPI baspasóz xızmeti.