Respublikamız joqarı bilimlendiriw hám ilim tarawındaǵı kórnekli pedagog, záberdes ustaz, belgili alım – pedagogika ilimleriniń kandidatı, professor Kudaybergenova Tajixal Kuchkarovna sál kem 64 jasında ómirden ótti.

Tajixal Kudaybergenova óz miynet jolın 1984-jılı mektepte baslawısh klass muǵallimi sıpatında baslaǵan bolsa, ómiri dawamında bilimlendiriw tarawınıń barlıq buwınlarında jemisli miyneti etti.

1999-jıldan baslap búgingi kúnge shekem Ájiniyaz atındaǵı Nókis mámleketlik pedagogikalıq institutında assistent, úlken oqıtıwshı, docent, professor sıyaqlı lawazımlarda jumıs isledi.

2005-jılı pedagogika ilimleri boyınsha kandidatlıq dissertaciyasın tabıslı qorǵadı. Tálim-tárbiya tarawındaǵı jetiskenlikleri ushın 2014-jılı «Qaraqalpaqstan Respublikası xalıq bilimlendiriw aǵlası» kókirek belgisi menen sıylıqlandı.

2005-jıldan baslap milliy ideya, ruwxıylıq tiykarları hám huqıq tálimi bakalavr tálim baǵdarı, sonday-aq, social-gumanitar pánlerdi oqıtıw metodikası (ruwxıylıq tiykarları) magistratura qánigeligi boyınsha kadrlar tayarlaw jumıslarına elewli úles qostı hám bul tarawda 160 tan aslam pitkeriw qánigelik jumısına, 10 magistrlik dissertaciyasına ilimiy basshılıq etti. Búgingi kúnde onıń shákirtleri respublikamızdıń barlıq aymaqlarında óz isiniń mamanı sıpatında tanılıp, nátiyjeli xızmet etpekte.

Professor T.Kudaybergenova institutımızda ilimiy-pedagogikalıq kadrlar tayarlaw jumısına da ayrıqsha úles qosıp, pedagogika ilimleri boyınsha 2 filosofiya doktorına (PhD) ilimiy basshılıq etti. Onıń ilimiy basshılıǵında 3 doktorant dissertaciya jumısları ústinde izleniwler alıp barmaqta.

Ol huqıqıy tálim-tárbiya tarawına baylanıslı 70 ten aslam maqala, bir monografiya, 10 metodikalıq qollanba, 5 oqıw qollanbası hám 3 sabaqlıq sıyaqlı ilimiy miynetlerge avtorlıq etti.

Ádiwli ustaz Tajixal Kuchkarovna Kudaybergenovanıń jarqın esteligi júregimizde máńgi saqlanadı.

Marhumnıń shańaraq aǵzaları, aǵayin-tuwısqanları, shákirtlerine tereń qayǵırıw menen kewil aytamız.

Ájiniyaz atındaǵı Nókis mámleketlik pedagogikalıq institutı rektoratı, jámiyetlik shólkemleri, Tariyx fakulteti, milliy ideya, ruwxıylıq tiykarları hám huqıq tálimi kafedrası jámááti.