Ibrayım Yusupov – qaraqalpaq xalqınıń jańa bir jámiyetlik kóterińki dáwirindegi shayır, kórkem sóz sheberi, zıyalısı.

Usı ullı insannıń tuwılǵanına bıyıl sarras 90 jıl toldı. Bul sáne xalqımızdıń hár bir jerinde keńnen belgilenip atır. Bizlerdiń institutımızda da bul bayram sıpatında keńnen belgilenip, hár qıylı koncert baǵdarlamaları, jarıslar shólkemlestirildi.

Bizlerdiń, yaǵnıń filologiya fakultetiniń studentleri jaqsı qatnasıp, usı jarısta  toparımız benen sıylı 2-orındı iyelewge miyassar boldıq.

Bul ullı bayram ele de dawam etpekte. Toparımız basshısı Gawxar Patullaeva toparımızda “I. Yusupov shıǵarmalarınıń bilimdanı” atlı kesheni  shólkemlestirdi. 

Bul keshede qızıqlı baǵdarlamalar boldı. Yaǵnıy, studentler tárepinen I. Yusupov qosıqlarınan túrlı tillerde úzindiler keltiriw, namalı qosıqlarınan  duwtar menen atqarıw, shayır dóretiwshiligi boyınsha soraw-juwaplar, shayırdıń portreti sızılıp, publicistikalıq maqalalar oqıp berildi.

Bul keshege hámme toparımız aǵzaları belsendi qatnastı. Duwtar menen namalı qosıqtı A. Qudaybergenova, G. Ómirbaevalar atqardı. Rus tilinde ,  túrkmen tilinde,inglis  tillerinde shayırdıń qosıqlarınan úzindiler keltirdi.  Soraw-juwaplarǵa 3 komanda aǵzaları da tolıǵı menen juwap berip jedel qatnastı.

Ásirese, toparımızdaǵı B.Matjanovanıń «Ana» haqqındaǵı aytqan monologı tamashagóylerdiń barlıǵınıń kewillerin bosatıp jılatıp jiberdi.

Solay etip, toparımızda ótkerilgen I.Yusupov keshesi hámmege maqul boldı. Bul kesheni shólkemlestirgen Gawxar Patullaevaǵa hámmemiz minnetdar boldıq. Ustazımız bolsa bizlerdi I.Yusupov qoyımshılıǵına ziyaratqa alıp baratuǵın boldı. 

Fatima Otarbaeva