Búgin, 16-fevral kúni Ájiniyaz atındaǵı Nókis mámleketlik pedagogikalıq institutında «Sergeklik – dáwir talabı» atamasındaǵı ushırasıw keshesi bolıp ótti.

Ushırasıwǵa Din isleri boyınsha komiteti Qaraqalpaqstan Respublikası aymaqlıq basqarmasınıń din isleri boyınsha bas qánigesi N.Jamalov, Nókis qalasındaǵı Imam iyshan Muhammed jámáátlik meshiti imamınıń orınbasarı A.Jolawshiev, Ishki isler ministrliginiń terrorizmge qarsı gúresiw basqarmasınıń qánigeleri, professor-oqıtıwshılar hám studentler qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha orınbasarı Q.Qodirov basqarıp bardı.

Ushırasıwda taraw qánigeleri elimizde jaslardıń bilim alıwı, kásip-óner úyreniwi, isbilermenlik penen shuǵıllanıwı ushın jaartılıp atırǵan imkaniyatlar haqqında ayta kelip, sońǵı jıllarda keleshek iyeleri bolǵan jaslardı nadurıs jollarǵa baslaw ushın bolıp atırǵan hár qıylı unamsız háreketler boyınsha maǵlıwmatlar berdi.

Ásirese, globallıq internet tarmaqları arqalı ózleriniń jaman niyetlerin ámelge asırıp, bunıń ushın jaslardıń psixologiyalıq dúnyasına keri tásir etiw jaǵdayları jiyi ushıraspaqta.

Sonıń menen birge, jaslardıń diniy bilim hám kónlikpeleriniń jetispewinen paydalanıp, hár qıylı missionerlik aǵımlarǵa qosılıw jaǵdaylarınıń júz berip atırǵanı da mısallar tiykarında atap ótildi.

Ilajda internet tarmaqlarındaǵı usınday unamsız illetler, terrorizm, ekstremizge baǵdarlawshı materiallardan paydalanbaw, sonday-aq, házirgi waqıtta kóp ushırasıp atırǵan onlayn qumar oyınlarınıń keri tásirleri haqqında tolıq maǵlıwmatlar berildi.

Ushırasıwda studentler kóterilgen temalar boyınsha ózlerin qızıqtırǵan sorawlarına qánigeler tárepinen tolıq juwaplar aldı.

NMPI baspasóz xızmeti.