Nókis mámleketlik pedagogikalıq institutın pitkergen joqarı maǵlıwmatlı pedagog kadrlarınıń jumıs penen támiyinlewshileri tiykarınan Qaraqalpaqstan Respublikası Xalıq bilimlendiriw ministrligine qaraslı orta bilim beriw mektepleri, Qaraqalpaqstan Respublikası Mektepke shekemgi bilimlendiriw ministrligine qaraslı mákemeleri, sonday-aq Qaraqalpaqstan Respublikası Kásiplik bilimlendiriwdi rawajlandırıw hám muwapıqlastırıw basqarmasına qaraslı akademiyalıq licey, kásip-óner mektepleri hám texnikumları bolıp esaplanadı.

2020-2021-oqıw jılında bakalavr tálim baǵdarı hám magistratura kánigelikleri pitkeriwshileri ushın institut Marketing hám studentler ámeliyatı bólimi baslaması menen “Kareranı rejelestiriw” atamasında instituttıń májilisler zalında jumıs beriwshiler menen ushırasıwlar bolıp ótti.

Atap ótilgenindey, usı jılı instituttı 2101 pitkeriwshi, sonnan 24 bakalavr tálim baǵdarı boyınsha 1744, 20 magistratura qánigelikleri boyınsha 357 magistrant pitkeriwi kútilmekte. Bul ushırasıwdan gózlengen tiykarǵı makset pitkeriwshilerdiń bántligin támiyinlew, olardıń keleshektegi jumıs orınların tańlawǵa kómeklesiw, bolajaq kadrlardı jumıs beriwshiler menen tanıstırıw, isbilermenlik penen shuǵıllanıwǵa baǵdarlawdan ibarat.

Ushırasıwǵa Qaraqalpaqstan Respublikası Xalıq bilimlendiriw, Mektepke shekemgi bilimlendiriw, Bántlik hám miynet qatnasıqları ministrlikleri, Qaraqalpaqstan Respublikası kásipke baǵdarlawshı “Jumısqa márhamat” MONO orayı, rayonlıq mektepke shekemgi bilimlendiriw bólimleri wákilleri, institut bólistiriw komissiyası, pitkeriwshiler hám professor-oqıtıwshılar qatnastı.

Jumıs beriwshiler hám pitkeriwshiler ortasında soraw-juwap qızǵın ótip, pitkeriwshiler ózlerin qızıqtırǵan sorawlarǵa juwaplar aldı.