Allaniyaz Óteniyazov 1936-jılı 1-iyun kúni Kegeyli rayonı aymaǵında diyqan shańaraǵında dúnyaǵa kelgen.

Ol 1956-jılı Qaraqalpaq mámleketlik pedagogikalıq institutı (házirgi Ájiniyaz atındaǵı Nókis mámleketlik pedagogikalıq institutı)nıń shet tilleri fakulteti inglis tili baǵdarına oqıwǵa kirdi hám oqıwın 1962-jılı pitkerdi.

Studentlik jıllarında paxta terimine qatnasıp, hár jılı 15-16 tonnadan aslam paxta teretuǵın bolǵan. Ol 1962-2002-jılları Nókis rayonındaǵı 4-sanlı mektepte muǵallim bolıp isledi.

Allaniyaz Óteniyazov ómirlik joldası menen birge bir ul, eki qızdı tárbiyalap, kámalǵa keltirdi.

1954-jıldan baslap óziniń jazǵı dem alıs waqıtların qayır-saqawat jumıslarına baǵıshlap, kem támiyinlengen, mayıplıǵı bolǵan hám jetimlerge jay salıp beriw menen shuǵıllanǵan.

Ómiri dawamında 40 turaq jay, 2 mektep, 30 orınlıq 2 balalar baqshası, 2 medicinalıq xızmet ornı, 1 kitapxana imaratın óz miyneti arqasında qurıp pitkerip, xalıqqa sawǵa etken. 2000-jılı 15 gektarlıq maydanǵa baǵ ekken.

Allaniyaz Óteniyazovtıń bunday miynetleri joqarı bahalanıp, oǵan «Ózbekstan selekcionerleri» húrmetli ataǵı, «Mehnat shuhrati» ordeni berilgen. Onıń ómiri hám iygilikli jumısları haqqında 3 film islendi. Onıń miynetleri dúnyada teńsiz atanıp, «Ginnes rekordları» kitabına kirgizildi.

Húkimetimiz tárepinen Allaniyaz Óteniyazovtıń miynetleri múnásip bahalanıp, 2001-jılı «Ózbekstan Qaharmanı» húrmetli ataǵı berildi.

NMPI baspasóz xızmeti.