Ájiniyaz atındaǵı Nókis mámleketlik pedagogikalıq institutı málimleme-resurs orayında 21-oktyabr – Ózbek tili bayramı kúni múnásibeti menen «Mámleketlik til – milliy ruwxıylıǵımız tımsalı» atamasındaǵı keshe bolıp ótti.

Keshege pedagogika ilimleri boyınsha filosofiya doktorı Olimjon Eshimbetov, málimleme-resurs orayı direktorı Gúlayım Jiyemuratova, oraydıń sırt el málimleme-kitapxana resursları menen islew bólimi baslıǵı Rita Amanbaeva, Anıq pánler fakulteti dekanınıń orınbasarı Xalmurat Esemuratov, sonday-aq, usı fakultettiń belsendi studentleri qatnastı.

Ilajda sózge shıqqanlar Ózbekstan Respublikasınıń «Mámleketlik tili haqqında»ǵı Nızamınıń qabıl etilgenine 36 jıl tolıwı bayramı menen barlıq qatnasıwshılardı qutlıqlap, usı nızamnıń mazmunı hám áhmiyeti, mámleketlik hám jámiyetlik turmıstaǵı ornı, jaslar arasında ana tiline húrmetti arttırıw máseleleri dodalandı.

Keshe dawamında ustazlar ózbek tili xalqımızdıń milliy maqtanıshı hám ruwxıylıǵınıń tiykarı ekenin atap ótti hám jaslardı tilimizdiń taza hám durıs qollanıwına dıqqatlı bolıwǵa shaqırdı.

Ilaj qábiletli studentler atqarıwındaǵı koncert baǵdarlaması menen dawam etti.

NMPI baspasóz xızmeti.