Usı jıldıń 5-sentyabr kúni respublikamızdaǵı barlıq joqarı oqıw orınlarında 2018-2019-oqıw jılı baslanatuǵınlıǵı haqqında xabar bergen edik.
Jańa oqıw jılı aldınan búgin – 4-sentyabr kúni Ájiniyaz atındaǵı Nókis mámleketlik pedagogikalıq institutınıń barlıq fakultetlerinde studentlerdiń ata-anaları menen ushırasıw kesheleri shólkemlestirildi.
Ushırasıwlarǵa qatnasqan institut rektorı Bayram Ótemuratov studentlerge tálim-tárbiya beriwde bilimlendiriw mákemeleri menen ata-analardıń tıǵız baylanıs ornatıwı, onıń unamlı nátiyjeleri hám keleshek áwladlardı tárbiyalawdaǵı áhmiyetine keń túrde toqtaldı.
Bunıń ushın ata-analar tárepinen basshılıqqa alınatuǵın ayrım máselelerdi ayta kelip, sonıń menen birge, ata-analardıń institut jámáátinen nelerdi kútip atırǵanı, qanday tilek hám usınısları, pikirleri bar ekenligi menen qızıqsındı hám jıynalǵanlar menen óz ara soraw-juwap formasında pikir almasıldı.
Ushırasıwlarda institut prorektorları, fakultetler dekanları hám professor-oqıtıwshılar, sonday-aq, ata-analar sózge shıǵıp, jas áwladtı tárbiyalaw, olarǵa joqarı bilim beriwdey iygilikli islerde aldaǵı birgelikte islenetuǵın wazıypalardı belgilep aldı.