15-sentyabr kúni Tashkent qalasındaǵı «Turkiston» sarayında joqarı oqıw orınları studentleri arasında dástúriy ótkerilip kiyatırǵan «Quwnaqlar hám ziyrekler» tańlawınıń sherek final basqıshı bolıp ótti. Onda Tashkent qalasınan «Creative», Tashkent mámleketlik agrar universiteti Termiz filialınıń «Janub yulduzlari», Samarqand mámleketlik arxitektura-qurılıs institutınıń «Arxitektor», Nawayı wálayatınan «Qanotchi» hám Nókis mámleketlik pedagogikalıq institutınıń «Turan» komandaları belgilengen shártler tiykarında óz qábiletlerin kórsetti. SHerek final basqıshı juwmaqlarına bola, Nókis mámleketlik pedagogikalıq institutınıń qábiletli studentlerinen dúzilgen «Turan» komandası jeńimpazlıqtı qolǵa kirgizdi hám kelesi – yarım final basqıshına jol aldı. «Turan» komandası sárdarı Dástan Bektursınovtıń aytıwına qaraǵanda, yarım final basqıshı usı jıldıń 22-24-noyabr kúnleri Tashkent qalasında bolıp ótedi. Maǵlıwmat ushın, Nókis mámleketlik pedagogikalıq institutınıń «Turan» komandası 2015-jılı ótkerilgen «Quwnaqlar hám ziyrekler» tańlawınıń Ózbekstan boyınsha chempionı bolǵan edi.