Usı jıldıń 7-sentyabr kúni Ájiniyaz atındaǵı Nókis mámleketlik pedagogikalıq institutınıń barlıq akademiyalıq toparlarında Ózbekstan jaslar awqamı baslanǵısh shólkeminiń topar jetekshileri saylawı bolıp ótti. Onda instituttıń barlıq bakalaviatura hám magistratura toparlarında ashıq dawıs beriw jolı arqalı topar jetekshileri saylandı.
Sonday-aq, 14-15-sentyabr kúnleri Ózbekstan jaslar awqamı Nókis mámleketlik pedagogikalıq institutındaǵı 9 fakultettiń jaslar jetekshileri saylawı da joqarı shólkemleskenlik penen ótkerildi.
– Ótken jılı 5-iyul kúni Ózbekstan Respublikası Prezidentiniń «Jaslarǵa baylanıslı mámleketlik siyasattıń nátiyjeliligin arttırıw hám Ózbekstan jaslar awqamı jumısların qollap-quwatlaw haqqında»ǵı pármanı tastıyıqlanǵan edi. Pármanda atap ótilgenindey, jaslar menen islesiwdi ele jetilistiriw, olardıń ishine ele de kirip barıp, bir iygilikli maqset jolında birlestiriw, mashqalaların úyreniw, qızıǵıwshılıqların hám umtılısların múnásip bahalaw maqsetinde hár jańa oqıw jılı basında hár bir joqarı oqıw ornında topar, fakultet hám joqarı oqıw ornınıń jaslar jetekshileri saylawın ótkeriw belgilengen. Institutımızda da bul jumıslar ádillik hám áshkaralıq principi tiykarında ótkerilmekte, – deydi Ózbekstan jaslar awqamı Nókis mámleketlik pedagogikalıq institutı baslanǵısh shólkemi jetekshisi wazıypasın waqıtsha atqarıwshı Hamid Qurbanbaev.
Maǵlıwmat ushın, institut jaslar jetekshisi saylawı usı jıldıń 21-22-sentyabr kúnleri ótkeriliwi jobalastırılǵan.