Kafedra baslıǵı:	Kabulova L.B.
	Tel.:	+998 (91) 394 47 44
	e-mail:	kabulova1806@mail.ru

     Ájiniyaz atındaǵı Nókis mámleketlik pedagogikalıq institutında mámleketimiz ǵárezsizlikke erisken jılları Tábiyattanıw kafedrası quramınan 1993-jılı óz aldına «Botanika» hám «Zoologiya» kafedraları bólinip shıqtı. 1999-jılı «Botanika» kafedrası janında ximiya laborotoriyası shólkemlestirilip usınıń tiykarında 2000-jılı NMPIdiń Ilimiy Keńesi qararı menen «Ximiya» kafedrası dúzildi.

     2000-2006 jıllar aralıǵında kafedra ataması «Ximiya» kafedrası, 2006-jıl yanvar ayınan baslap «Ximiya hám ekologiya» kafedrası bolıp qayta ashıldı. 2016-2017-jıllar aralıǵında bolsa kafedra ataması «Ximiya oqıtıw metodikası» bolıp ózgertilip házirgi kúnge shekem óz iskerligin júrgizip kelmekte.

Kafedraǵa tómendegi professor-oqıtıwshılar basshılıq qılǵan:

•  1999-2001-jıllarda x.i.d., professor O.Asamatdinov;
•  2001-2005-jıllarda x.i.k., docent A.Jiyemuratov;
•  2005-2012-jıllarda b.i.k., docent F.Otenova;
•  2013-2014-jıllarda x.i.k., docent A.Asamatdinov;
•  2014-2016-jıllarda x.i.k., docent B.Jumabaev;
•  2016-2021-jıllarda t.i.d., docent A.Kaipbergenov;
•  2021-jıl oktyabr ayınan baslap t.i.f.d., docent L.Kabulova basshılıq etip kelmekte.

     Házirgi kúnde kafedrada 18 professor-oqıtıwshı bolıp, sonnan: 1 professor w.w.a., 4 docent, 1 docent w.w.a., 2 p.i.f.d (PhD), 1 úlken oqıtıwshı, 4 assistent hám 5 stajyor oqıtıwshı xizmet kόrsetpekte.

     2024-jıl 14-noyabrde kafedra assistenti M.Artiqov “Ximiya oqıtıwda oqıwshılardıń dóretiwshilik jumıs iskerligi kónlikpelerin qáliplestiriw metodikasın jetilistiriw” temasında pedagogika ilimleri filosofiya doktorı (PhD) ilimiy dárejesin aldı. Elimizde Ózbekstan Respublikasınıń «Bilimlendiriw haqqında»ǵı nızamın ámelge asırıw kóleminde oqıtıwdıń kompleksli sisteması, yaǵnıy hár tárepleme jetilisken, sawatlı, zamanagóy pikirlewshi jas áwládtı qáliplestiriwde kafedra professor-oqıtıwshılarınıń qosıp atırǵan úlesleri júdá úlken. Ózbekstan Respublikasi Prezidentiniń 2021-jıl 19-maydaǵı «Ózbekstan Respublikasında shet tillerin úyreniwdi ǵalaba en jaydırıwdı sapa tárepinen jańa basqıshqa alıp shıǵıw haqqında» ǵı PQ-5117-sanlı qararına muwapıq kafedrada 2 oqıtıwshı shet tilin biliw dárejesi boyınsha B1 hám A1 sertifikatlarına iye.

     Kafedra úlken oqıtıwshısı x.i.k., A.Asamatdinov Germaniya mámleketi (Deutsche Gesellschaft für Internationale Zusammenarbeit (GIZ)) benen birgelikte “Jasıl” ushın universitet hám sanaat sherikligi grantları sanaatlastırıw tiykarında “Development and production of the construction materials on the basis of municipial wastes” proekti jámi 330,000,000 (úsh júz otız million) swmdı quraydı.

     Házirgi waqıtta kafedranın ilimiy teması «Qaraqalpaqstannıń jergilikli shiyki zat resursların fizik-ximiyalıq usıllar járdeminde qásiyetlerin úyreniw hám ámeliyatqa engiziw» atamasında bolıp, tema boyınsha tema tiykarında kafedra professor oqıtıwshıları maqalalar, oqıw hám oqıw metodikalıq qollanbalar shıǵarıp kelmekte.