ӨзА хабаршысы Есимқан Қанаатовтың мәлим етиўинше, Үлкен Қырққыз қала археологиялық комплексинде археологиялық қазыў жумысларын алып барып атырған Нөкис мәмлекетлик педагогикалық институты тарийх-география факультети профессор-оқытыўшылары ҳәм студентлери әмелий сабақларды сол жердиң өзинде алып бармақта.

Мағлыўматларға қарағанда, қазыў жумысларында россиялы илимпазлар да қатнаспақта. Қазыў нәтийжесинде студентлер тәрепинен б.э.ш. III-IV әсирлерге тийисли болған гүзе ҳәм басқа да буйымлар табылмақта.

Автордың хабарда жазыўынша, факультеттиң 1-курс студенти қазыў жумыслары даўамында дийўалға сызылған көк реңли сүўретти тапқан. Бул үлкен тарийхый табылма екенлиги айтылмақта.

Рестовратор Вадим Ягодинниң билдириўинше, бул дүньялық әҳмийетке ийе табылма бола алады.