Berdaq atındaǵı Qaraqalpaq mámleketlik universitetiniń mádeniyat sarayında Qaraqalpaqstan Respublikasındaǵı barlıq joqarı oqıw orınlarınıń student-jasları qatnasıwında jaslardıń innovaciyalıq ilimiy hám sociallıq salalarǵa jańa joybar hám ideyaların ámeliy jaqtan engiziw, sonıń menen birge, jámiyette korrupsiyaǵa qarsı gúresiw, jasırın ekonomikanı saplastırıwǵa qaratılǵan “Start Up” joybarlardı realizaciya etiwge qaratılǵan “Jaslardıń Start Up joybarları” forumı shólkemlestirildi.

Forumda Informatika oqıtıw metodikası magistrantı A.Keńesbaev “Aral boyındaǵı bilimlendiriw mákemelerin multimedialı baǵdarlamalar menen támiyinlew” joybarı hám Informatika oqıtıw metodikası studenti Sh.Óteniyazov “Ulıwma bilim beriw mekteplerinde Delphi programmalastırıw tilin úyretiwde qaraqalpaq tilindegi dástúriy támiynat” atamasındaǵı  Start Up joybarları menen qatnastı.

Forum sheńberinde joqarı oqıw orınlarınıń “Start Up”shı studentleri arasında jańa innovaciyalıq joybarlar menen tanısıw, bir-birleri menen pikir almasıw hám keleshekte Aral boyındaǵı jas studentlerdiń birgelikte qospa joybarlardı ámelge asırıw hám onı bilimlendiriw mákemelerine engiziw jolları boyınsha pikir almasıwlar bolıp ótti.

Bunday “Start Up” joybar forumlarınıń tez-tezden ótkeriliwi jaslar arasınan ziyrek hám tereń pikirlewshi jaslardı izlep tabıwda úlken áhmiyetke iye.