Әжинияз атындағы Нөкис мәмлекетлик педагогикалық институтында «Шахс қәлиплесиўинде инновациялық-креатив қатнастың педагогикалық ҳәм психологиялық өзгешеликлери» атамасында республикалық илимий-теориялық конференция онлайн форматта болып өтти.

Педагогика ҳәм психология илиминдеги заманагөй өзгерислер, инновациялық-креатив идеяларды әмелиятқа енгизиў, креатив қатнаста болыў механизмлерин анализлеў, жас алымлар ҳәм зийрек студентлерди илимге бағдарлаў, илимий раўажланыўдағы соңғы өзгерислерди әмелиятқа енгизиў сыяқлы бир неше мақсетлерди гөзлеп шөлкемлестирилген республикалық илажға республикамыздағы көплеген жоқары оқыў орынларының профессор-оқытыўшылары, илимий изертлеў орайларының илимпазлары ҳәм жас излениўшилер қатнасты.

Конференцияда «Авестода тәлим-тәрбиялық мәселелер», «Балалардың шахс болып қәлиплесиўинде музыканың тәрбиялық тәсири», «Балалардың психикалық раўажланыўында креатив қатнастың психологиялық өзгешеликлери», «Басқарыўда мақсетлерге ерисиўде стратегиялық қарардың әҳмийети» сыяқлы темаларда баянатлар жасалды ҳәм өз ара пикир алмасыўлар, сораў-жуўаплар менен даўам етти.