Ózbekstan Respublikası Ministrler Kabinetiniń 2017-jıl 14-noyabrdegi «Ózbekstan jaslar awqamınıń belsendi aǵzalarına joqarı oqıw orınlarına kiriwde jeńillikler beriw haqqında»ǵı qararı tiykarında Ózbekstan Jaslar awqamı Qaraqalpaqstan Respublikalıq Keńesi Jaslar awqamı bas sárdarı Gúlayim Erjanbaeva múddetinen burın test sınaqlarısız joqarı oqıw orınına grant tiykarında oqıwǵa qabıllanıp, student bolıw baxtına miyasar boldı. Bul haqqında Qaraqalpaqstan xabar agentligi xabar bermekte.

Gúlayım Erjanbaeva usı jılı Shımbay rayonındaǵı 14-sanlı ulıwma orta bilim beriw mektebin altın medal menen tabıslı pitkergen.

-«Kamalak» balalar shólkemine kirip kelgenimnen baslap túrli tańlaw, seminar-trening hám respublikalıq kólemde ótkerilip kiyatırǵan forumlarǵa belsene qatnasıp kelmektemen. Atap aytqanda, 2015-jıldan baslap 2017-jılǵa shekem «Kamalak» juldızları» balalar dóretiwshilik festivalınıń Qaraqalpaqstan Respublikası basqıshında jeńimpaz boldım. Sonday-aq, 2018-jılı «Eń úlgili rayon (qalalıq)» sárdarlar keńesi tańlawınıń Ózbekstan basqıshında «Aydın keleshek» toparı menen birgelikte jeńimpaz bolıwǵa erisken bolsaq, sárdarlar keńesi menen «Xoshamet-2018» sıylıqlaw máresiminde «Jıldıń eń belsendi sárdarlar keńesi» nominaciyası boyınsha jeńimpaz boldıq. Jaqında Jaslar isleri agentligi tárepinen dúzilgen «Jaslar másláhátshileri» klubı aǵzası bolıp, Buxara wálayatına koordinator boldım, – deydi G.Erjanbaeva. Álbette, bunday jetiskenliklerge erisiwimde ata-anamnıń, ustazlarımnıń qollap-quwatlawı ayırıqsha boldı. Sonday-aq, maǵan jaqsı tálim-tárbiya bergen ustazlarım Ikram Abdiqalikov hám Sárbinaz Jolımbetovalardan sheksiz minnetdarman. Olardıń bergen durıs jol-jobası, tárbiyası arqasında student bolıwǵa eristim. Endi Ájiniyaz atındaǵı Nókis mámleketlik pedagogikalıq institutında oqıp, inglis tili boyınsha bilimlerimdi jetilistirip, ustazlarımnıń isenimin aqlamaqshıman.