Ájiniyaz atındaǵı Nókis mámleketlik pedagogikalıq institutı súwretlew óneri hám injenerlik grafikası tálim baǵdarınıń 3-kurs studenti Gúlnur Sársenova Kamoliddin Behzod atındaǵı mámleketlik stipendiyasınıń jeńimpazı bolǵanı haqqında aldın xabar bergen edik.

Usı jıldıń 16-avgust kúni Ózbekstan Kórkem óner akademiyasınıń Konferenciyalar zalında mámleketlik stipendiya tańlawınıń jeńimpazların sıylıqlaw ilajı bolıp ótti.

Ilajda institut studenti G.Sársenovaǵa Kamoliddin Behzod atındaǵı mámleketlik stipendiyasınıń jeńimpazı bolǵanı haqqındaǵı gúwalıq saltanatlı túrde tapsırıldı.

Mámleketlik stipendiyası 1-sentyabrden baslap bir oqıw jılı dawamında belgilengen muǵdarda tólenedi.

Maǵlıwmat ornında atap ótiw kerek, Kamoliddin Behzod atındaǵı mámleketlik stipendiyası Ózbekstan Respublikası Prezidentiniń 2020-jıl 21-apreldegi «Súwretlew hám ámeliy kórkem óner tarawı nátiyjeliligin arttırıwǵa baylanıslı qosımsha ilajlar haqqında»ǵı qararına muwapıq, ÓzR Ministrler Kabinetiniń 2020-jıl 6-noyabrdegi qararı tiykarında shólkemlestirilgen bolıp, joqarı oqıw orınlarında súwretlew hám ámeliy kórkem óner jáne dizayn baǵdarında oqıp atırǵan studentler ushın beriledi.

NMPI baspasóz xızmeti.