Mámleketlik test orayınıń mandat saytındaǵı diziminde Prezident grantı ushın talaban bolatuǵın abiturientlerdiń dizimi járiyalandı. Oǵan muwapıq, 185,85 balldan joqarı kórsetkishke erisken 233 abiturient Prezident grantına talabanlıq etedi. Bul haqqında Xushnudbek Xudayberdiev óz kanalında jazdı.

Xabarda jazılıwınsha, 200-orındaǵı abiturient penen birdey ball toplaǵan barlıq abiturientler usı grantqa talaban boladı. Nátiyjelerge qaraytuǵın bolsaq, 185-orınnan 233-orınǵa shekem abiturientler birdey 185,85 ball toplaǵan, sonlıqtan olardıń barlıǵı Prezident grantına talaban bolıp esaplanadı.

Respublika boylap ulıwma 75 abiturient eń maksimall 189 ball toplaǵan.

Maǵlıwmat ornında atap ótiw orınlı, Prezident grantın alǵanlar eger tólemli kontraktqa kirgen bolsa da, mámleketlik grant tiykarında oqıydı.

Prezident grantına talaban bolǵan 233 abiturienttiń altawı Qaraqalpaqstandaǵı joqarı oqıw orınlarına hújjet tapsırǵan. Yaǵnıy:

Qaraqalpaq mámleketlik universiteti – 4;
Nókis mámleketlik pedagogikalıq institutı – 1;
Qaraqalpaqstan medicina institutı – 1.

Sonı qosımsha etiw kerek, bul maǵlıwmatlar koronavirusqa shatılǵan yamasa test kúni temperaturası joqarı bolǵan abiturientler ushın bolıp ótetuǵın test nátiyjelerinen keyin ózgeriwi múmkin.

Islam Matekov,
Qaraqalpaqstan xabar agentligi.