Qaraqalpaqstan Respublikası Joqarǵı Keńesi Prezidiumınıń «1-oktyabr – «Muǵallimler hám ustazlar kúni» múnásibeti menen Qaraqalpaqstan Respublikasınıń mámleketlik sıylıqları hám kɵkirek belgileri menen sıylıqlaw haqqında»ǵı qararına muwapıq, elimizde tálim-tárbiya sistemasın dáwir talapları tiykarında jetilistiriw, tarawdaǵı reformalardı nátiyjeli ámelge asırıw jumıslarına qosqan salmaqlı úlesi, jaslarǵa ilim úyretiw hám zamanagɵy kásip-ɵnerlerge baǵdarlaw, olardı ana Watanǵa muhabbat, ǵárezsizlik ideyalarına sadıqlıq ruwxında tárbiyalawdaǵı kɵp jıllıq jemisli miynetleri hám jámiyetlik turmıstaǵı belsendiligi ushın bir topar pidayı insanlar húrmetli ataqlar hám kɵkirek belgileri menen sıylıqlandı.

Olar arasında Ájiniyaz atındaǵı Nókis mámleketlik pedagogikalıq institutınıń rus tili hám ádebiyatı kafedrasınıń professorı Qutlımurat Qochanov «Qaraqalpaqstan Respublikasına miyneti sińgen jaslar ustazı» húrmetli ataǵı menen sıylıqlanǵan bolsa, instituttıń dene tárbiyası kafedrasınıń aǵa oqıtıwshısı Azat Kazakovtıń «Watan pidayısı» kókirek belgisi menen sıylıqlanǵanı «Muǵallimler hám ustazlar kúni» bayramına múnásip sawǵa boldı.

Sıylıqlanǵan professor-oqıtıwshılardı shın júrekten qutlıqlaymız!

NMPI baspasóz xızmeti.