Ózbekstan Respublikası bilimlendiriw mákemelerine oqıwǵa qabıllaw boyınsha Mámleketlik komissiyası tárepinen 2021-2022-oqıw jılında studentlikke usınıs etilmegen, biraq eselengen tólemli kontrakt («super kontrakt») tiykarında oqıw niyetin bildirgen abiturientler ushın tólemlerdi tólewge ruxsat berildi. Bul haqqında Joqarı hám orta arnawlı bilimlendiriw ministrligi xabar berdi.

Usı kategoriyadaǵı abiturientler t-kontrakt.edu.uz platforması arqalı onlayn tárizde yamasa tiyisli joqarı oqıw orınlarına tikkeley múrájat etken halda tólemli kontrakt shártnamasın rásmiylestiriwi múmkin.

Tólemlerdi tólew múddeti 2021-jıl 20-noyabrge shekem etip belgilendi.

Bunda tólemniń 50 procenti tólengen jaǵdayda abiturientti studentlikke usınıs etiw boyınsha joqarı oqıw ornı basshısınıń buyrıǵı rásmiylestiriledi.

Koronavirus infekciyasına qarsı shanshılǵan studentlerge shegirme beriw múddeti uzaytıldı

Kópshilikke belgili, respublikamızdaǵı joqarı oqıw orınlarında bilim alıp atırǵan hám 2021-jıl 1-noyabrge shekem koronavirus infekciyasına qarsı vakcina alǵan studentlerge 2021-2022-oqıw jılı ushın belgilengen stipendiya qosılmaǵan bazalıq tólemli kontrakt summasına bir mártelik 10 procentlik shegirme (bonus) belgilengen edi.

Bunnan bılay usı múddet uzaytılǵan halda 15-noyabrge shekem koronavirus infekciyasına qarsı vakcina alǵan hám sertifikat tapsırǵan barlıq studentlerge stipendiyasız bazalıq tólemli kontrakt summasına bir mártelik 10 procentlik shegirme bonusı beriledi.