«Facebook» sociallıq tarmaǵındaǵı «Xalq nazorati» jámiyetlik toparında «Gulnara Xojametova» isimli paydalanıwshınıń Nókis mámleketlik pedagogikalıq institutında sentyabr-oktyabr ayları ushın stipendiyanıń ne ushın irkilip atırǵanı haqqındaǵı múrájatı járiyalanǵan edi.

Ájiniyaz atındaǵı Nókis mámleketlik pedagogikalıq institutı baspasóz xızmeti usı múrájat boyınsha tómendegilerdi málim etedi:

Mámleketlik grant tiykarında oqıp atırǵan studentlerdiń stipendiya tólemi boyınsha

Házirgi waqıtta institutta 2021-2022-oqıw jılında mámleketlik grant tiykarında oqıp atırǵan joqarı kurs studentleri 1606 student bolıp, bul studentlerdiń hámmesine sentyabr hám oktyabr ayları ushın ulıwma 916,449,8 mıń sum muǵdarında stipendiya tólep berildi.

Al mámleketlik grant tiykarında 1-kursta oqıp atırǵan studentlerden 666 studentke sentyabr ayı ushın ulıwma 356,499,3 mıń sum muǵdarında naq pul kórinisinde stipendiyalar tólendi. Bul studentlerge oktyabr ayı ushın stipendiya tez arada naq pul kórinisinde tólep beriliwi támiyinlenedi. Sonıń menen birge, olarǵa kelesi aylarǵa stipendiya tólew maqsetinde bank plastik kartaların ashıw ushın tiyisli xızmet kórsetiwshi bankke sorawnamalar jiberildi.

Tólemli kontrakt tiykarında oqıp atırǵan studentlerdiń stipendiya tólemi boyınsha

Házirgi waqıtta institutta stipendiyalı tólemli kontrakt tiykarında oqıp atırǵan hám shártnama shártlerinde kórsetilgen summanı tólegen ulıwma 150 studenttiń sentyabr hám oktyabr ayları ushın ulıwma 74,258,0 mıń sum muǵdarındaǵı stipendiyaları tolıǵı menen tólep berildi.

Ájiniyaz atındaǵı Nókis mámleketlik pedagogikalıq institutı baspasóz xızmeti.