Ózbekstan Respublikası Ministrler Kabinetiniń 2021-jıl 4-noyabrdegi 675-sanlı qararına muwapıq, ekonomikalıq tarmaqlarda keminde bes jıllıq miynet stajına iye bolǵan puqaralardı sırtqı hám keshki bilimlendiriw baǵdarlarına sáwbet nátiyjelerine bola eselengen tólemli kontrakt tiykarında oqıwǵa qabıllaw tártibi haqqındaǵı reje tastıyıqlandı. Bul haqqında «Huquqiy axborot» kanalı xabar berdi.

Rejege muwapıq, keminde 5 jıllıq miynet stajına iye puqaralarǵa sáwbet nátiyjelerine bola eselengen tólemli kontrakt tiykarında oqıwǵa kiriw ushın usınısnama beretuǵın ministrlik, mákeme hám iri xojalıq birlespeleriniń dizimi hár jılı 1-iyulǵa shekem tastıyıqlanıp, ǴXQda járiyalanadı.

Ministrlik, mákeme hám iri xojalıq birlespeleri hár bir oqıw jılı ushın oraylıq hám aymaqlıq strukturaları jáne sistema shólkemlerinen 100 talabanǵa shekem usınısnama beriwi múmkin.

Tiyisli usınısnamaǵa iye puqaralar hár jılı 20-iyuldan 10-avgustqa shekem Mámleketlik test orayınıń arnawlı elektron sisteması arqalı dizimnen ótkeriledi.

Sáwbet procesi hár jılı 20-avgusttan 30-avgustqa shekemgi bolǵan múddette shólkemlestiriledi.

Nátiyjelerge muwapıq, 100 ballıq bahalaw kriteriyasında 55 ball hám onnan joqarı ball toplaǵan abiturientler JOO rektorı (direktorı)nıń buyrıǵı tiykarında eselengen tólemli kontrakt tiykarında studentlikke usınıs etiledi.

Usınısnamalar tek ǵana berilgen oqıw jılı ushın ámel etedi.

Reje joqarı áskeriy hám áskeriylestirilgen bilimlendiriw mákemelerine, Ózbekstandaǵı sırt ellerdiń hám mámleketlik emes joqarı bilimlendiriw shólkemlerine jáne olardıń filiallarına engizilmeydi.

Bul tártip 2022-jıl 1-maydan baslap kúshke kiredi.

Islam Matekov,
Qaraqalpaqstan xabar agentligi.