Usı jıldıń 19-20-21-noyabr kúnleri Tashkent wálayatınıń Almalıq qalasındaǵı «Metallurg» sport kompleksinde voleybol boyınsha Ózbekstan superkubogı jarısları bolıp ótedi.

Hayal-qızlar arasında ótkeriletuǵın jarısta bir neshe márte Ózbekstan chempionı hám superkubogı jeńimpazı bolǵan Ájiniyaz atındaǵı Nókis mámleketlik pedagogikalıq institutınıń «NMPI» qızlar saylandı komandası ázeliy qarsılası bolǵan Ózbekstan mámleketlik dene tárbiya hám sport universitetiniń «SKUF» komandasına qarsı oynaydı.

Málim bolıwınsha, oyınlar eki jeńiske shekem dawam etedi. Eger dáslepki eki oyında Ózbekstan superkubogı qarama-qarsılıǵınıń jeńimpazı anıqlansa, sońǵı úshinshi oyın ótkerilmeydi hám jarıs toqtatıladı.

Eger dáslepki eki oyınnan soń kúshler teń kelip qalsa, superkubok jeńimpazı sońǵı úshinshi kúngi oyında anıqlanadı. Usı superkubok jarısları menen Ózbekstanda bıyılǵı jılǵı voleybol máwsimi óz juwmaǵına jetedi.

Biz óz gezeginde «NMPI» qızlar saylandı komandasına superkubok jarıslarında áwmet tilep qalamız!

Islam Matekov,
NMPI baspasóz xatkeri.