Ájiniyaz atındaǵı Nókis mámleketlik pedagogikalıq institutında Ózbekstan Respublikası Ministrler Kabineti janındaǵı Bilimlendiriw sapasın qadaǵalaw boyınsha mámleketlik inspekciyasınıń bólim baslıǵı Rahmatjon Rózmetov basshılıǵında májilis bolıp ótti.

Májiliste mámleketlik inspekciya tárepinen Ózbekstanda jumıs alıp barıp atırǵan joqarı oqıw orınları hám filiallarınıń 2020-jıldaǵı milliy reytingi járiyalanǵanı hám onda Nókis mámleketlik pedagogikalıq institutı ulıwma 33,46 ball menen 59-orındı iyelegeni haqqında sóz boldı.

Institut rektoratı, fakultet dekanları, kafedralar hám bólimlerdiń baslıqları, professor-oqıtıwshılar qatnasqan májiliste instituttıń milliy reytingdegi nátiyjelerin jaqsılaw, bunıń ushın aldaǵı 3 jıl dawamında basqıshpa-basqısh orınlanatuǵın kafedralar, fakultetler hám institut kólemindegi jol kartaların islep shıǵıw jáne orınlanıwın támiyinlew baǵdarında ámelge asırılatuǵın jumıslar belgilep alındı.

Atap ótilgenindey, professor-oqıtıwshılardıń ilimiy jumısları, oqıw-metodikalıq jumıslar hám oqıtıwdıń sapası, studentlerdiń bilimi hám pitkeriwshilerdiń sapalıq kórsetkishleri, dene tárbiyası hám sporttı rawajlandırıw boyınsha ámelge asırılıp atırǵan jumıslar ótken jıllarǵa salıstırǵanda joqarı bolǵanı menen, milliy reytingde ele de joqarı kórsetkishlerge erisiw ushın usı baǵdardaǵı jumıslardı sapalıq jaqtan jetilistiriw wazıypaları belgilendi.

NMPI baspasóz xızmeti.