Xabarıńız bar, Ózbekstan Respublikası Joqarı hám orta arnawlı bilimlendiriw ministrligi tárepinen studentler jáne oqıwshı-jaslar ushın qısqı dem alıs usı jıldıń 25-dekabr kúninen 2022-jıldıń 10-yanvarına shekem etip belgilendi. Usı dem alıs dáwirinde Ájiniyaz atındaǵı Nókis mámleketlik pedagogikalıq institutında oqıp atırǵan student-jaslardıń bos waqıtların mazmunlı ótkeriw maqsetinde ámelge asırılatuǵın wazıypalarǵa arnalǵan jıynalıs bolıp ótti.

Jıynalıstı instituttıń Jaslar máseleleri hám ruwxıy-aǵartıwshılıq isleri boyınsha prorektorı Quvondiq Qodirov ashtı hám basqarıp bardı.

Jıynalısqa instituttıń jaslar tárbiyasına juwapker xızmetkerleri – fakultetlerdiń dekan orınbasarları, jaslar awqamı institut baslanǵısh shólkeminiń jetekshisi, Studentler Keńesi basshıları, tyutorlar hám psixolog, sonday-aq, pedagog-tárbiyashılar qatnastı.

Jıynalıs dawamında:
– dem alıs dáwirinde tastıyıqlanǵan joba tiykarında studentler menen ruwxıy-aǵartıwshılıq baǵdarındaǵı jumıslardı úzliksiz dawam ettiriw;
– jaslar arasında hár qıylı jınayatshılıq hám huqıqbuzarlıq jaǵdayları profilaktikasın kúsheytiw jáne olardıń ata-anaları menen turaqlı baylanısta bolıw;
– dem alıs dawamında Prezident Sh.Mirziyoevtiń «Jańa Ózbekstan strategiyası» kitabı tiykarında «Watanımnıń rawajlanıwına óz úlesimdi qosaman» atamasındaǵı maqalalar tańlawın shólkemlestiriw;
– dem alıs dáwirinde «14-yanvar – Watan qorǵawshıları kúni»ne baǵıshlanǵan maqalalar, shıǵarmalar, súwretler, qosıqlar hám videorolikler tańlawların onlayn tárizde shólkemlestiriw jáne hár bir baǵdar boyınsha fakultet jeńimpazları dizimin 12-yanvar kúni institut jumısshı toparına tapsırıw;
– dem alıs dáwirinde Studentler turaq jayında qalatuǵın túrkmenstanlı hám qazaqstanlı sırt elli studentlerdiń jaǵdayınan turaqlı xabar alıw sıyaqlı áhmiyetli máseleler kórip shıǵıldı jáne wazıypalar belgilep alındı.

Jıynalısqa qatnasqan juwapkerler menen birgelikte kórip shıǵılǵan máselelerdi sistemalı túrde ámelge asırıw mexanizmleri de kelisip alındı.

NMPI baspasóz xızmeti.