Óziniń didaktikalıq qunlılıǵı menen pútkil dúnyaǵa belgili Káyqawıstıń «Qabusnama» shıǵarması qaraqalpaq tilinde qaytadan baspa júzin kórdi.

Bul shıǵarma eń dáslep filologiya ilimleriniń kandidatı, docent Q.Ismayılov tárepinen qaraqalpaq tiline awdarılıp, 1987-1991-jıllarda eki márte baspadan shıqqan edi. Sol awdarma tiykarında 2018-jılı «Ámiwdárya» jurnalınıń birqatar sanlarında da járiyalandı.

Ájiniyaz atındaǵı Nókis mámleketlik pedagogikalıq institutı magistrantı, Ózbekstan hám Qaraqalpaqstan Jazıwshılar awqamınıń aǵzası Allayar Dármenovtıń awdarmasındaǵı «Qabusnama»da pikirler aldınǵı awdarmaǵa salıstırǵanda tolıǵıraq, keńirek berilgen. Sebebi, eski dúzim dáwirindegi ayırım aytılıwı qadaǵan etilgen pikirler dáslepki awdarmaǵa kirmey, hátte birneshe baplar da tolıǵı menen túsirilip qaldırılǵan edi.

«Qabusnama» jámi 1000 nusqada Tashkent qalasındaǵı «Yosh avlod matbaa» baspasınan basılıp shıqtı. Onı shıǵarıwda Qaraqalpaqstan Respublikası prokuraturası tikkeley qáwenderlik etti.

Aradan on ásir ótse de elege deyin dúnyanıń eń bahalı shıǵarmaları qatarında súyip oqılatuǵın, jámi 44 baptan ibarat «Qabusnama» qaraqalpaq kitap oqıwshıların taǵı da quwantatuǵını sózsiz.