Ózbekstan Respublikası Densawlıqtı saqlaw ministrliginiń málim etiwinshe, 2022-jıldıń 7-yanvar kúni Ózbekstanǵa kelgen sırt mámleket puqarasınan «COVID-19»dıń jańa «Omicron» shtammı anıqlanǵan.

Respublikalıq arnawlı komissiyasınıń qararına muwapıq, jámiyetlik orınlarda nıqap taǵıw, sociallıq aralıqtı saqlaw, jeke gigiena qaǵıydalarına qatań ámel etiw boyınsha qadaǵalaw kúsheytilmekte.

Xalıqtı tolıq shanshıw hám buster doza menen shanshıw jumısları jedellestirilmekte.

Ministrlik hám mákeme basshıları, shólkemlestiriw formasına qaramastan, barlıq shólkemlerde xızmetkerlerdiń shanshılǵannan soń jumıs orınlarına kiriwine ruxsat beriliwi belgilendi. Bul tártipti buzǵan shólkem basshılarına nızam hújjetlerinde belgilengen tártipte qatań shara kóriledi.

Joqarı oqıw orınlarınıń studentleri arasında dem alıs dawamında koronavirus infekciyasına qarsı tolıq shanshıw ilajları kóriledi. Bul ilajlarǵa JOO basshıları jeke juwapker etip belgilendi.

Ministrlik, mákemeler hám basqa mámleketlik shólkemler jáne xojalıq birlespelerinde mámlekette engizilgen karantin sheklewleri sharayatında xalıqtıń salamatlıǵın támiyinlew, elimizde epidemiologiyalıq jaǵday turaqlılıǵın saqlaw maqsetlerin názerde tutıp, hár qıylı ilajlardı shólkemlestiriw qadaǵan etildi.