Ájiniyaz atındaǵı Nókis mámleketlik pedagogikalıq institutında 14-yanvar – Watan qorǵawshıları kúni hám Ózbekstan Respublikası Qurallı Kúshleriniń dúzilgenine 30 jıl tolıwına baǵıshlanǵan ushırasıw keshesi bolıp ótti.

Instituttıń jaslar menen islesiw hám ruwxıy-aǵartıwshılıq isleri boyınsha prorektorı Q.Qadirov basqarıp barǵan ushırasıwǵa veteran áskeriy xızmetkerler, Arqa-batıs áskeriy okruginiń Nókis garnizonı, áskeriy bólimlerdiń komandirleri, múddetli áskeriy xızmetti atqarıp atırǵan er-azamatlar, sonıń menen birge, fakultetlerdiń dekan orınbasarları, tyutorlar hám onlayn tárizde «ZOOM» platforması arqalı belsendi student-jaslar qatnastı.

Ushırasıwda shıǵıp sóylegenler mámleketimiz Qurallı Kúshleriniń dúziliwi, sońǵı jıllarda jáne de rawajlandırıw, onıń jawıngerlik tayarlıǵın jetilistiriw, materiallıq-texnikalıq bazasın bekkemlew, xalıqaralıq abıroyın arttırıw baǵdarında ámelge asırılıp atırǵan jumıslar, tarawdaǵı reformalardıń nátiyjeliligi haqqında maǵlıwmatlar berdi.

Ótken jıllar dawamında Ózbekstan Respublikasın rawajlandırıw boyınsha Háreketler strategiyası hám Qorǵanıw doktorinası tiykarında áhmiyetli jáne tariyxıy qararlar qabıl etildi. Ásirese, elimiz kóleminde áskeriy-hákimshilik sektorlarınıń dúzilgenligi, jergilikli byudjet qarjıları esabınan áskeriy xızmetlerdi qollap-quwatlaw, olarǵa múnásip jumıs hám turmıs sharayatların jaratıp beriwde islenip atırǵan jumıslar óz nátiyjelerin bermekte.

Atap aytqanda, milliy armiyamızdıń aymaqlıq, xalıqaralıq reytinglerdegi, ótkerilip atırǵan hár qıylı jarıslardaǵı kórsetkishleri joqarılamaqta. Búgingi kúnde Qurallı Kúshlerimiz dúnya júzinde 51-orın, ǴMDA mámleketleri arasında 4-orın, al Oraylıq Aziya mámleketleri arasında 1-orındı iyelemekte.

Milliy, aymaqlıq hám globallıq qáwipsizlikke qarsı hár qıylı qáwipler júz berip atırǵan búgingi kúnde xalqımızdıń tınısh hám paraxat turmısta ómir súriwi, shegaralarımızdıń pútinligin jáne qolqatılmaslıǵın támiyinlew hár birimizdiń aldımızdaǵı baslı wazıypalardan biri bolıp esaplanadı.

Ilajda usınday úlken maqsetlerden kelip shıǵıp, Prezidentimizdiń «Jańa Ózbekstannıń 2022-2026-jıllarǵa belgilengen Rawajlanıw strategiyası haqqında»ǵı pármanınıń joybarında kórsetip ótilgen jeti baslı baǵdardıń biri elimiz qáwipsizligi hám qorǵanıw potencialın kúsheytiw, ashıq-aydın hám pragmatikalıq, jedel sırtqı siyasat alıp barıw ekenligi, sonday-aq, olardan kelip shıǵıp ámelge asırılatuǵın jobalar dodalandı.

Ushırasıwda bayram múnásibeti menen «Xalıq hám armiya – bir tán, bir jan» súreni tiykarında student-jaslar arasında onlayn tárizde videorolikler, shıǵarmalar hám plakatlar tańlawları, hár qıylı kitapqumarlıq hám intellektual turnirler ótkerilip atırǵanı haqqında maǵlıwmatlar berildi.

Ilaj sońında student-jaslar, tyutorlar hám basqa da shıǵıp sóylewshiler jıynalǵanlardı bayram menen qutlıqlap, maqtanıshlı hám mashaqatlı jumıslarında tabıslar tiledi.

Islam Matekov,
NMPI baspasóz xatkeri.
Avtordıń túsirgen fotoları.