Búgin, 7-fevral kúni Ájiniyaz atındaǵı Nókis mámleketlik pedagogikalıq institutında 600 orınlıq studentler turaq jayınıń paydalanıwǵa tapsırılıwına arnalǵan saltanatlı ilaj bolıp ótti.

Ilajǵa Ózbekstan Respublikası Joqarı hám orta arnawlı bilimlendiriw ministriniń orınbasarı Sarvarxon Buzrukxonov, institut jámááti hám ǵalaba xabar quralları wákilleri qatnastı.

Paydalanıwǵa tapsırılıp atırǵan studentler turaq jayınıń qurılıs-rekonstrukciya jumısları ushın instituttıń byudjetten tıs qarjıları esabınan 3 milliard 855 million sum qarjı ajıratılıp, «Golden Star» JShJnıń sheber qurılısshıları tárepinen jedel pátlerde hám sapalı etip pitkerildi. Rekonstrukciya jumıslarınan aldın 400 orınǵa mólsherlengen studentler turaq jayına zamanagóy eki yaruslı jataq orınları ornatılıp, 600 orınǵa beyimlestirildi. Zamanagóy joybar tiykarında qurılıs-rekonstrukciya jumısları alıp barılǵan studentler turaq jayı 1 milliard 600 million sumlıq mebel inventarları, 545 million sumlıq zamanagóy gaz plitaları, muzlatqıshlar, kir juwıw mashinaları, mikrotolqınlı pechler, utyugler, suw ısıtqısh úskeneleri sıyaqlı turmıslıq texnikalar menen támiyinlendi.

Studentler turaq jayında student-jaslardıń oqıwdan bos waqıtların mazmunlı ótkeriwi, dem alıwı, qosımsha dógereklerge qatnasıwı, bilim alıwı ushın barlıq sharayatlar jaratılǵan. Atap aytqanda, Prezidentimiz tárepinen alǵa súrilgen bes baslamanı studentler arasında keń en jaydırıw maqsetinde zamanagóy informaciyalıq texnologiyalar, kompyuterler bólmesi, málimleme-resurs orayı, kórkem ónerge qızıǵıwshı jaslar ushın saz ásbapları menen támiyinlengen dógerekler, jaslardıń bos waqıtlarında tigiwshilik sırların úyreniwi ushın tigiw mashinaları menen támiyinlengen dógerekler, sonıń menen birge, awqatlanıw, juwınıw, internet tarmaǵınan paydalanıw, gazeta-jurnallar oqıp, televizor tamashalaw ushın barlıq qolaylıqlar jaratılǵan.

Maǵlıwmat ornında atap ótiw kerek, studentler turaq jayına birinshi gezekte sırt el puqaraları, alıs wálayatlar hám rayonlardan qatnap oqıytuǵın kem támiyinlengen, jetim, baǵıwshısınan ayrılǵan, «Temir dápter»ge kirgizilgen shańaraqlardıń perzentleri ornalastırıladı.

Ilajda qurılıs-rekonsrukciya jumısları juwmaqlanǵan 600 orınlıq studentler turaq jayınıń simvolikalıq gilti saltanatlı túrde tapsırılıp, dástúriy lenta qesildi.

Ilaj qatnasıwshıları studentler turaq jayındaǵı sharayatlar menen tanıstı.

Sonı qosımsha etiw orınlı, aldaǵı waqıtlarda Nókis mámleketlik pedagogikalıq institutınıń 5 qabatlı, 1250 orınǵa mólsherlengen zamanagóy jańa studentler turaq jayları qurılıwı jobalastırılǵan bolıp, bunıń ushın 73 milliard 322 million sum qarjı ajıratılǵan.

Usı jerde atap ótiw kerek, Prezident pármanı menen tastıyıqlanǵan «Jańa Ózbekstannıń 2022-2026-jıllarǵa belgilengen rawajlanıw strategiyasın «Insan qádirin ulıǵlaw hám belsendi máhálle jılı»nda ámelge asırıwǵa baylanıslı mámleketlik baǵdarlaması», sonıń menen birge, Ózbekstan Respublikası Ministrler Kabinetiniń «Respublikalıq joqarı bilimlendiriw mákemelerinde studentlerdi turaq jay menen qamtıp alıw dárejesin arttırıw ilajları haqqında»ǵı qararı tiykarında alıp barılıp atırǵan usınday jumıslar bul máselege mámleketlik hám húkimetlik dárejede ayrıqsha dıqqat qaratılıp atırǵanınan dárek beredi.

Ministr orınbasarı S.Buzrukxonov instituttıń jańadan qurılıp atırǵan bas imaratı hám rekonstrukciya jumısları alıp barılıp atırǵan basqa oqıw imaratlarındaǵı qurılıs-ońlaw jumısların kózden ótkerip, jumıslardı sapalı etip pitkeriw boyınsha kórsetpeler berdi.

Ájiniyaz atındaǵı Nókis mámleketlik pedagogikalıq institutı baspasóz xızmeti.