Ózbekstan Respublikası Prezidentiniń «Professional bilimlendiriw sistemasın jańa basqıshqa kóteriw boyınsha reformalardı jedellestiriw hám kásiplik kónlikpelerdi rawajlandırıw ilajları haqqında»ǵı qararınıń joybarı járiyalandı.

Qarar joybarına muwapıq, dual bilimlendiriw túrin engizgen professional bilimlendiriw mákemelerine ishki imkaniyatınan kelip shıǵıp oqıwshılar ushın stipendiya yamasa materiallıq xoshametlewler engiziw wákilligi beriledi. Bul haqqında huqıqtanıwshı-bloger Xushnudbek Xudayberdiev óz kanalında málim etti.

Bunıń ushın mákeme óziniń tiyisli boysınıwındaǵı ministrlik yamasa shólkem menen kelisiwi kerek boladı.

Qarjılardı bilimlendiriw mákemeleriniń ózi tómendegiler esabınan biyǵárez túrde qáliplestiriwi múmkin boladı:

– bos bolǵan oqıw xanaları, óndirislik ustaxanaların oqıw kursların shólkemlestiriw, ónim islep shıǵarıw hám xızmetler kórsetiw ushın 5 jılǵa shekemgi bolǵan múddetke ijaraǵa beriw;
– mákemeniń oqıw-ámeliyat procesinde islep shıǵarılǵan ónimlerin (xızmetlerin) prezentaciya etiw hám satıw.

Professional bilimlendiriw mákemelerine óz shólkemlestiriwindegi juwapkershiligi sheklengen jámiyetlerdi shólkemlestiriw huqıqı beriledi.

Stipendiya ajıratıw tártibin Qarjı ministrligi menen Joqarı hám orta arnawlı bilimlendiriw ministrligi 2022-jıl 1-avgustqa shekem islep shıǵıwı kórsetip ótilgen.

Qarar joybarı menen kórsetilgen silteme arqalı tanısıwıńız hám pikir-usınıslarıńızdı bildiriwińiz múmkin: https://regulation.gov.uz/oz/d/56858

Karinform.uz