Búgin, 16-fevral kúni Ájiniyaz atındaǵı Nókis mámleketlik pedagogikalıq institutınıń bir topar professor-oqıtıwshıları hám student-jasları Arqa-batıs áskeriy okruginiń áskeriy bólimleriniń birinde jaslardı watan súyiwshilik ruwxında tárbiyalaw maqsetinde shólkemlestirilgen «Milliy armiyamız – jaslar názerinde» atamasındaǵı ilajǵa qatnastı.

Institut jámááti áskeriy bólimde jańadan qurıp pitkerilgen ruwxıy-aǵartıwshılıq orayı, sport kompleksi, fitnes zalı, málimleme-resurs orayında múddetli áskeriy xızmetti atqarıp atırǵanlar hám shártnama tiykarında jumıs alıp barıp atırǵan áskeriy xızmetkerler ushın jaratılǵan sharayatlar menen tanıstı.

Ilaj dawamında mektep oqıwshıları, institut jámááti hám múddetli áskeriy xızmetti atqarıp atırǵan áskeriy xızmetkerler qatnasıwında «Milliy armiyamız – jaslar názerinde» atamasındaǵı ushırasıw ótkerilip, onda instituttıń jaslar máseleleri hám ruwxıy-aǵartıwshılıq isleri prorektorı Q.Qodirov shıǵıp sóyledi.

Ol óz sózinde mámleketimiz Qurallı Kúshleriniń dúziliwi, sońǵı jıllarda jáne de rawajlandırıw, onıń jawıngerlik tayarlıǵın jetilistiriw, materiallıq-texnikalıq bazasın bekkemlew, xalıqaralıq abıroyın arttırıw baǵdarında ámelge asırılıp atırǵan jumıslar, tarawdaǵı reformalardıń nátiyjeliligi haqqında shıǵıp sóylep, ótken jıllar dawamında Ózbekstan Respublikasın rawajlandırıw boyınsha Háreketler strategiyası hám Qorǵanıw doktorinası tiykarında áhmiyetli jáne tariyxıy qararlar qabıl etilgenligi, ásirese, elimiz kóleminde áskeriy-hákimshilik sektorlarınıń dúzilgenligi, jergilikli byudjet qarjıları esabınan áskeriy xızmetlerdi qollap-quwatlaw, olarǵa múnásip jumıs hám turmıs sharayatların jaratıp beriwde islenip atırǵan jumıslar óz nátiyjelerin berip atırǵanın atap ótti.

Sonday-aq, Prezidentimizdiń «Jańa Ózbekstannıń 2022-2026-jıllarǵa belgilengen Rawajlanıw strategiyası haqqında»ǵı pármanınıń joybarında kórsetip ótilgen jeti baslı baǵdardıń biri elimiz qáwipsizligi hám qorǵanıw potencialın kúsheytiw, ashıq-aydın hám pragmatikalıq, jedel sırtqı siyasat alıp barıw ekenligi haqqında da maǵlıwmatlar berdi.

Prorektor Q.Qodirov institut jámááti tárepinen tayarlap kelingen kitaplardı áskeriy bólim xızmetkerlerine sawǵa etti.

Ushırasıwda instituttıń belsendi studentleri de shıǵıp sóylep, áskeriy bólimdegi sharayatlardı kórip kewilleri tolǵanlıǵın, bunday imkaniyatlardan nátiyjeli paydalanıp atırǵan jaslar úlken nátiyjelerge erisip atırǵanın atap ótti. Elimizdiń tınıshlıǵın, xalqımızdıń paraxat turmısın támiyinlep atırǵan áskeriy xızmetkerlerge tereń minnetdarshılıq bildirdi.

Ushırasıw Arqa-batıs áskeriy okrugi Nókis garnizonı áskeriy orkestri hám instituttıń talantlı studentleriniń atqarıwındaǵı koncert baǵdarlaması menen dawam etti.

Ilaj sońında institut professor-oqıtıwshıları hám studentler áskeriy qural jaraqlar, zamanagóy texnikalar kórgizbesi, áskeriy xızmetkerlerdiń shıǵıwların tamasha etti.

NMPI baspasóz xızmeti.