Búgin, 19-fevral kúni respublikamız boylap qorshaǵan ortalıqtı abadanlastırıw, kóklemzarlastırıw, ekologiyalıq jaǵdaydı jaqsılaw maqsetinde «Jasıl mákan» akciyası ótkerilmekte.

Akciya sheńberinde Nókis qalası «Jiydeli Baysın» mákan puqaralar jıyını aymaǵındaǵı tayarlanǵan 3,2 gektarlıq maydanǵa hár qıylı miyweli hám dekorativ terek nálleri otırǵızıldı.

Akciyaǵa barlıq mákeme, shólkemlerden, mákan puqaralar jıyınlarınan kelgen adamlar menen birge Ájiniyaz atındaǵı Nókis mámleketlik pedagogikalıq institutı jámááti hám student-jasları da belsene qatnasıp, ana tábiyatımızdı qorǵaw, jasap turǵan aymaǵımızdı abadanlastırıwday iygilikli jumıslarǵa óz úleslerin qostı.

Akciyaǵa Qaraqalpaqstan Respublikası Ministrler Keńesiniń Baslıǵı Q.Sariev qatnasıp, ilajda belsendilik kórsetip atırǵan barlıq qatnasıwshılarǵa minnetdarshılıq bildirdi.

Qaraqalpaqstan Respublikası Ministrler Keńesi málimleme xızmetiniń xabar beriwinshe, bıyıl respublikamızda «Jasıl mákan» akciyası sheńberinde 8 millionnan aslam terek nálleri egiliwi jobalastırılǵan.

Akciya sheńberinde barlıq aymaqlarda abadanlastırıw jumısları dawam etpekte.

Islam Matekov,
NMPI baspasóz xatkeri.
Avtordıń túsirgen fotoları.