Búgin, 9-mart kúni Ájiniyaz atındaǵı Nókis mámleketlik pedagogikalıq institutında 220 ǵa shamalas atamadaǵı 1500 nan aslam jańa kórkem-ádebiy kitaplar paydalanıwǵa tapsırıldı.

Ilajǵa Ózbekstan xalıq jazıwshısı, Qaraqalpaqstan xalıq shayırı, Qaraqalpaqstan Jazıwshılar awqamınıń baslıǵı, institut pitkeriwshisi bolǵan Keńesbay Kárimov, fakultet dekanlarınıń orınbasarları, professor-oqıtıwshılar, málimleme-resurs orayınıń qánigeleri hám studentler qatnastı.

Ilajdı instituttıń jaslar máseleleri hám ruwxıy-aǵartıwshılıq isleri boyınsha prorektorı Q.Qodirov basqarıp bardı.

Atap ótilgenindey, búgingi kúnde Prezidentimizdiń bes áhmiyetli baslaması tiykarında xalqımız arasında kitapqumarlıq mádeniyatın arttırıw, jaslardı ǵalabalıq túrde kitapqumarlıqqa baǵdarlaw boyınsha mámleketlik siyasat dárejesinde bir qatar jumıslar ámelge asırılmaqta. Óytkeni, Prezidentimiz atap ótkenindey, búgin kitap oqıp atırǵan bala erteńgi kúni televizor kórip otırǵan on balanı basqaradı.

Keshede Qaraqalpaqstan Jazıwshılar awqamınıń baslıǵı K.Kárimov ilajǵa qatnasıp otırǵan Zulfiya atındaǵı Mámleketlik sıylıqtıń bıyılǵı laureatı bolǵan institut studenti Erkinay Orınbaeva hám onıń ustazı, docent Sofiya Tájetdinovanı qutlıqlap, bayram sawǵaların tapsırdı. Sonday-aq, házirgi waqıtta Jazıwshılar awqamı tárepinen jazıwshı, shayırlardıń kitapların baspaǵa tayarlaw, jarıq kóriwine járdem beriw baǵdarında islenip atırǵan jumıslar haqqında maǵlıwmat berdi. Jańadan paydalanıwǵa tapsırılıp atırǵan kitaplar qatarına Ibrayım Yusupov hám Tólepbergen Qayıpbergenovtıń, sonıń menen birge, jazıwshınıń óz qáleminen dórelgen shıǵarmaları toplanǵan jańa kitaplar instituttıń málimleme-resurs orayına sawǵa etildi.

Ilajda paydalanıwǵa tapsırılıp atırǵan jańa kitaplar tanıstırılıp, olardıń mazmunı hám áhmiyeti haqqında pikir alısıwlar bolıp ótti.

Maǵlıwmat ornında atap ótiw orınlı, bul kitaplar búgingi kúnniń jasları tárepinen oqılıwı zárúr bolǵan, belgili insanlar, qánigeler tárepinen usınıs etilgen eń jaqsı kitaplardan ibarat bolıp, olardı satıp alıw ushın instituttıń óz qarjıları esabınan 40 million sumǵa shamalas qarjı ajıratıldı.

NMPI baspasóz xızmeti.