Ózbekstan Respublikası Joqarı hám orta arnawlı bilimlendiriw ministrligi Ukrainadan respublikalıq joqarı oqıw orınlarına oqıwın kóshiriw haqqındaǵı arzalardı qabıllaw boyınsha shólkemlestirilgen aymaqlıq jumısshı toparlar haqqındaǵı maǵlıwmattı járiyaladı.

Xabarda jazılıwınsha, Ukrainadan qaytqan studentlerdiń oqıwın 15-marttan baslap ápiwayılastırılǵan tártipte kóshiriw baslandı.

Prezident Sh.Mirziyoyev basshılıǵında 4-mart kúni ótkerilgen videoselektor jıynalısında berilgen tapsırmaǵa muwapıq, Ukrainadan qaytıp, oqıwın Ózbekstanda dawam ettiriw niyetinde bolǵan studentlerdiń hújjetleri aymaqlıq jumısshı toparlar tárepinen qabıl etilmekte.

Bul processte studentler jasaw aymaqlarında shólkemlestirilgen jumısshı toparlarǵa múrájat etiwi hám tolıq maǵlıwmat alıwı múmkinligi atap ótilgen.

Qaraqalpaqstan Respublikası boyınsha aymaqlıq jumısshı topar Qaraqalpaq mámleketlik universitetinde shólkemlestirilgen bolıp, +99861 223 59 52, +99861 223 58 31 telefon nomerleri arqalı qosımsha maǵlıwmatlarǵa iye bolıwıńız múmkin. Sonday-aq, bul máselede ministrliktiń +99871 207 16 57 telefon nomerine de múrájat etiwge boladı.

Maǵlıwmat ornında atap ótiw kerek, usı kúnge shekem Joqarı hám orta arnawlı bilimlendiriw ministrligi menen Sırtqı isler ministrligine usı másele boyınsha múrájat etken puqaralar, sonıń ishinde, studentlerdiń sırt el joqarı oqıw orınları hám jasaw aymaqları kesimindegi dizimi qáliplestirilip, aymaqlardaǵı jumısshı toparlarǵa jiberilgen.

Islam Matekov,
Qaraqalpaqstan xabar agentligi.