Ájiniyaz atındaǵı Nókis mámleketlik pedagogikalıq institutı pedagogika hám psixologiya bakalavr tálim baǵdarınıń 4-kurs studenti Aysultan Sharafatdinova 2022-jıl yanvar-fevral aylarında ótkerilgen «Все дороги ведут в МАДИ» atamasındaǵı xalıqaralıq intellektual tańlawınıń juwmaqları boyınsha jeńimpaz dep tabılıp, Moskva avtomobil jolları mámleketlik texnikalıq universitetiniń 38.04.03 «Qánigelerdi basqarıw» qánigeligi boyınsha magistratura basqıshına oqıwǵa waqtınan burın qabıl etildi. Oqıw qárejetleri Rossiya Federaciyası federal byudjetinen qaplanıwı málim etildi.

Bul tańlawda qatnasıp jeńimpaz dep tabılǵan Abxaziya, Qazaqstan, Qırǵızstan, Tájikstan, Turkmenstan, Ukraina hám Ózbekstan student jasları arasınan respublikamızdıń 8 studenti qatarında institutımızdıń studenti mámleketler aralıq kelisimlerge muwapıq mámleketlik kvota boyınsha magistratura qánigeligine waqtınan burın oqıwǵa kiriwge miyasar bolǵanlıǵı, álbette, quwanıshlı hám ayrıqsha maqtawǵa arzıytuǵın waqıya. Biz Aysultan Sharafatdinovanı qutlıqlay otırıp, oǵan aldaǵı oqıwlarında tabıslar tilep qalamız!