Búgin, 9-aprel kúni Samarqand mámleketlik shet tilleri institutınan Otabek Yusupov basshılıǵındaǵı wákilleri Nókis mámleketlik pedagogikalıq institutı rektorı Bayrambay Otemuratovtıń qabıllawında boldı.

Ushırasıwda elimizde shet tillerin oqıtıw sistemasın túp-tiykarınan jetilistiriw baǵdarında ámelge asırılıp atırǵan reformalardıń nátiyjeleri, tarawda aldaǵı turǵan wazıypalar boyınsha pikir almasıldı.

Ushırasıw dawamında shet tillerin tereń meńgergen, básekige shıdamlı kadrlardı tayarlaw, professor-oqıtıwshılardıń qánigeligin jetilistiriw hám ilimiy-izertlew jumısların óz ara birgelikte rawajlandırıw maqsetinde Samarqand mámleketlik shet tilleri institutı hám Nókis mámleketlik pedagogikalıq institutı arasında birge islesiw shártnamasına qol qoyıldı.

Maǵlıwmat ornında atap ótiw kerek, Nókis mámleketlik pedagogikalıq institutında 50 ge shamalas xalıqaralıq joqarı oqıw orınları, ilimiy-izertlew orayları, sonıń menen birge, respublikalıq joqarı oqıw orınları menen birge islesiw shártnamaları dúzilgen bolıp, ámeliy jumıslar alıp barılmaqta.

Samarqand mámleketlik shet tilleri institutı Ózbekstandaǵı shet tilleri boyınsha joqarı maǵlıwmatlı kadrlardı tayarlawda óziniń bay tariyxı, qádiriyatları hám ajıralmas ornına iye joqarı oqıw ornı bolıp, búgingi kúnde Rossiya, Germaniya, Italiya, Qıtay, Malayziya, Koreya, Yaponiya hám basqa kóplegen mámleketlerdiń joqarı oqıw orınları menen turaqlı túrde birge islesip kelmekte.

NMPI baspasóz xızmeti.