Ájiniyaz atındaǵı Nókis mámleketlik pedagogikalıq institutı Pedagogika fakulteti muzıkalıq tálim kafedrasınıń shólkemlestiriwinde «Bolajaq muzıka oqıtıwshıların tárbiyalawda pedagoglardıń dóretiwshilik jumısları hám ornı» atamasındaǵı respublikalıq ilimiy-ámeliy konferenciya bolıp ótti.

Konferenciyanı ilimiy isler hám innovaciyalar boyınsha prorektor M.Jalelov kiris sózi menen ashıp berip, búgingi kúnde joqarı oqıw orınlarında bolajaq muzıka oqıtıwshılarınıń ilimiy-dóretiwshilik jumısların jetilistiriw, mekteplerde muzıka pánin oqıtıw sapasın arttırıw, mektepke shekemgi bilimlendiriw shólkemleri hám mekteplerde usı baǵdardaǵı jumıslardı jetilistiriw áhmiyetli wazıypalardan biri ekenligin atap ótti hám konferenciyanıń jumıslarına tabıslar tiledi.

Konferenciyanıń ashılıw plenarlıq májilisinde filologiya ilimleriniń doktorı, professor K.Allambergenov «Qaraqalpaq jıraw, baqsılarınıń dóretiwshiliginde ustaz-shákirtlik dástúrleriniń ayırım máseleleri», pedagogika ilimleriniń doktorı, professor Ó.Álewov «Muzıka hám estetikalıq tárbiya», Ózbekstan mámleketlik kórkem óner hám mádeniyat institutı Nókis filialınıń oqıtıwshısı, docent G.Xojametova «Роль педагогики в развитии образования будущих преподавателей музыки в высших учебных заведениях», usı filial oqıtıwshısı, docent G.Axımbetova «Dástan atqarıwshılıǵın rawajlandırıwda pragmatik ózgesheliklerdiń analizi», usı filialdıń oqıtıwshısı, docent Í.Moyanov «Qaraqalpaq baqsıshılıq kórkem ónerin ele de rawajlandırıwdıń konceptual máseleleri», TITU Nókis filialı oqıtıwshısı, docent G.Abilova «Формирование информационной компетенции будущих учителей музыки в условиях цифрового образовании», institut oqıtıwshısı, pedagogika ilimleriniń kandidatı S.Romanova «Maktabgacha yoshdagi bolalarning musiqiy ongini toʻgʻri shakllantirishda musiqa rahbarining mas’uliyati va pedagogik mahorati», muzıka hám kórkem óner qánigeliginiń 2-kurs magistrantı G.Axetova «Ulıwma bilim beriw mekteplerinde muzıka pánin oqıtıwda interaktiv metodlardan paydalanıw usılları» atamalarındaǵı bayanatları menen shıǵıp sóyledi.

Ilajda bayanatshılar institutta muzıkalıq tálim baǵdarı boyınsha dáslepki márte shólkemlestirilip atırǵan ilimiy-ámeliy konferenciyanıń áhmiyeti hám aldaǵı wazıypalarǵa ayrıqsha toqtaldı.

Konferenciya muzıkalıq tálim baǵdarı studentleriniń atqarıwındaǵı saz-sáwbetli muzıkalıq bólim, sonday-aq, sekciyalardaǵı bayanatlar menen dawam etti.

NMPI baspasóz xızmeti.