15-aprel kúni Ájiniyaz atındaǵı Nókis mámleketlik pedagogikalıq institutında baslawısh tálim kafedrasınıń shólkemlestiriwinde «Bilimlendiriwdiń sapasın arttırıwda sanlı texnologiyalardı qollanıw hám olardı kommerciyalastırıw máseleleri» atamasındaǵı xalıqaralıq onlayn ilimiy-teoriyalıq konferenciya bolıp ótti.

Ózbekstan Respublikası Prezidentiniń «Ilim-pándi 2030-jılǵa shekem rawajlandırıw koncepciyasın tastıyıqlaw haqqında»ǵı pármanı, «2022-2026-jıllarǵa mólsherlengen jańa Ózbekstannıń rawaajlanıw strategiyası haqqındaǵı» pármanı, «Úzliksiz mánawiy tárbiya koncepciyası» hám basqa da normativlik hújjetler tiykarında shólkemlestirilgen konferenciyaǵa instituttıń professor-oqıtıwshıları, doktorantlar, magistrantlar, student-jaslar menen birgelikte, Rossiya, Ukraina, Qazaqstan hám Ózbekstandaǵı joqarı oqıw orınları, ilimiy-izertlew oraylarınan professorlar, ilimiy-izertlew jumısların alıp barıp atırǵan izleniwshiler, ilimpazlar qatnastı.

Házirgi waqıtta bilimlendiriwdiń sapasın arttırıwda baslawısh tálimge aldınǵı pedagogikalıq tájiriybelerdi engiziw, xalıqaralıq bahalaw nátiyjelerine erisiw, bilimlendiriwge sanlı texnologiyalardı engiziw arqalı ilim, bilimlendiriw, ilimiy-izertlew jumıslarınıń nátiyjelerin kommerciyalastırıwǵa baylanıslı máselelerdi ilimiy-teoriyalıq kózqarastan dodalaw, sırt elli tájiriybeli qánigeler menen pikirlesiw, tájiriybe almasıw hám tiyisli usınıslar islep shıǵıwdı maqset etken konferenciyada bir qatar bayanatlar jasaldı.

Atap aytqanda, ilimiy isler hám innovaciyalar boyınsha prorektor M.Jalelov «Oqıw procesinde sanlı texnologiyalar», jaslar máseleleri hám ruwxıy aǵartıwshılıq isleri boyınsha birinshi prorektor Q.Qodirov «Xalqaro ijtimoiy tendensiyalar tizimida gʻoyaviy tarbiyaning asosiy yoʻnalishlari», Moskva pedagogikalıq mámleketlik universiteti rus tili hám onı baslawısh klasslarda oqıtıw metodikası kafedrasınıń baslıǵı M.Karavashkina «Плюсы» и «минусы» цифрового образования для школьников и студентов: уроки пандемии», Abay atındaǵı Qazaq Milliy pedagogikalıq universiteti pedagogika hám psixologiya institutınıń docenti G.Taubaeva «Mektepke deyingi uyımda pedagogikalıq texnologiyalardı paydalanıw ádistemesi» atamalarındaǵı bayanatları, sonıń menen birge, basqa da ilimpazlar tárepinen bayanatlar jasaldı.

Konferenciya óz jumısın sekciyalarda dawam ettirdi.

NMPI baspasóz xızmeti.